[Galeria] Kultura eta sormena izango dira Lekuonaren eguneroko ogia
Kultur azpiegituran azken ukituak ematen ari dira, gaur zortzi herritarrei irekitzeko. Sortzeko baliabide humano eta materialak utziko dituzte.
Lekuona herriarentzako erreferentzia izango da. Nahi baino gehiago luzatu da, baina gaur zortzi irekiko dute Lekuona. Herritarrek beren sormena mamitzeko labea izango da Oiartzun ibaiaren ertzeko faktoria zena.
Irekieraren atarian, berau ezagutzeko bisita gidatuak antolatu ditu Errenteriako Udalak. Arrakasta handiarekin: errenteriar zein inguruko bisitari ugarik beren jakin-mina asebete ahal izan dute.
Gaur eguerdian komunikabideentzako tour-a eskaini dute, Aizpea Otaegi alkatearen eskutik. Bisita gidatuentzako txartelik lortu ez duenak, leihotxo hauen bitartez bada ere, ezagut ditzake kultur faktoria berriaren barrunbeak.
Elikatzeko asmoa
Otaegik iraganeko izana eta etorkizunekoarekin analogia egin du. “Lehen ogi-tailerra zen, eta herritarrak elikatzeko ogia ateratzen zen. Orain kulturarekin elikatuko da”, esan du.
Okindegi zenaren izena eta eraikina bera mantendu direla gogorarazi du, ogi fabrika zaharrari keinu eginez.
Hori esanda, harrera gunea izango dena erakutsi du, sarrerako takilekin —dispositiboak kargatzeko entxufeak izango dituzte—. Lehenengo espazio horrek aisiako materiala jasotzen du: bideoak, diskoak… Mediateka moduko bat da.
Gainera, egun Niessenen dagoen Kultura Saileko bulegotxoa ordeztuko du kalearen mailan dagoen solairuko atal batek. Bertan erosi beharko dira, adibidez, sarrerak.
Espazio horretako aulki, mahai eta beste altzari batzuek gurpilak dituzte, gainontzeko espazioetan bezala. Otaegik bisita guztian nabarmendu du Lekuonaren filosofia dela espazioak nahieran eraiki ahal izatea, sormenerako. “Baliabide material eta humanoak jarriko ditugu horretarako”, ebatzi du.
Eskaileretan gora
0 eta 1 solairuak lotzen dituen eskailerak Gernikako Arbola plazaren zein herriaren skyline zati baten ikuspegi panoramikoa eskaintzen du.
Liburutegi antzekoa den beste espazio batera eramaten dute moketatutako mailek. Hura ere aldagarria da, eta haurrentzako diseinu antzekoa du… baina ez da beraiei bakarrik zuzenduta egongo.
Alkateak argitu du: “Espazioak ez dira belaunaldien bitartez bereiziko. Kontrakoa, baizik: haurrentzako materiala egongo da, baina —adibidez— bertsolaritzarekin lotutako gaiak hemen izango dira. Belaunaldien arteko komunikazio hori sustatu nahi dugu”.
Azpiko solairuko materiala aisiarekin lotuagoa baldin badago, lehen solairu horretako erreferentziak sormenarekin harreman handiagoa dute. Etsenplu gisa, hor egongo dira eleberriak.
Gortina bidez espazio itxiak sor daitezke, haurrentzako ipuin kontaketetarako edo beste hainbat ekitalditarako.
Toki isil bakarra, azken solairuan
Azkeneko solairuan talde lanean aritzeko espazioak daude, horiek ere nolanahi eraikitzeko moduan. Horrez gain, liburutegi “klasiko” baten funtzioa izango duen aretoa dago: ikasleek hor gorrituko dituzte ukondoak. Mahai bakoitzak entxufeak-eta izango ditu, garaiari ongi egokituta egoteko.
Eraikinaren ginga bezala, sorpresa bat erakutsi du Otaegik: teilatuko espazioa. Egunerokoan itxita egongo dela esan du, baina puntualki ireki daitekeela, formatu txikiko kontzertuak —adibidez— antolatzeko. Ehun lagunentzako espazioa dauka, eta barra jartzeko txokoa.
Auditorioa, gutizia nagusia
Lekuona eraikinaren gailurra ikusita, barrunbeak ezagutzeko txanda izan da. Liburutegiaren gordailua eta kamerinoak daude. Artistentzako aldagela horiek agertokiarekin lotuta daude.
Agertokiak ere badu bere mamia. Hiru agertokitan bana daiteke, eta 14×19 metroko oholtza nagusitik obraren araberako dimentsioa izango duena har daiteke. Zazpi disposizio ezberdin eskaintzen ditu Sorlekua izenarekin bataiatu duten aretotzarra.
Eserita 737 pertsona sartzen dira, eta zutik, 1.500. Argiteriarako hamabost bara izango ditu. Sorlekua sortzaileen eskura egongo dela adierazi dute, entseguak-eta egiteko.
Iratxe Ansa errenteriarra izango da oholtza hori estreinatuko duena, hilaren 29 eta 30ean. Espainiako Dantza Sari Nazionala lortu du, eta jaioterriko herrikideei eskainiko die bere lana. Haiek, bueltan, aitortza.
Sarrerak bihar jarriko dira salgai, Niessenen —oraindik bai— eta www.bibe.me webgunean. Iragarri dutenez, hurrengo artista Olatz Salvador izango da.
Bisitaldia, bukatzeko, kantina. Ondoko plazarekin konektatuta egongo da. Esleitze prozesuan dago, eta tokian tokiko janari eta edariak kontuan hartuko dituzte. Ogia bakarrik ezin delako jan.
-
- Oiartzun ibaiaren ardatz berriaren sinbolo izango da Lekuona.
-
- Zero solairuan mediateka antzekoa egongo da.
-
- Aisiako erreferentziak izango dituzte.
-
- Baliabide materialak nahieran mugitu ahal izango dira, espazioak sortzeko.
-
- Ikuspegi panoramikodun eskilarek lotzen dute 1 solairuarekin.
-
- Sormenezko erreferentziak egongo dira 1 solairuan.
-
- Haurrentzako —baina ez bakarrik— espazioak egongo dira 1 solairuan.
-
- 2 solairuan joango da isilik egoteko liburutegia.
-
- Teilatua formatu txikiko saioetarako agertoki izateko prestatua dago.
-
- ‘Sorlekua’ da agertoki nagusia; harmailak mugi daitezke.
