EAJ: "Eusko Jaurlaritza eta Ertzaintza eraso eginez etekin politikoa nahi du Sortuk"
Azken asteburuetako gertakariak izan ditu hizpide Oiartzungo EAJk, eta Sortuk kaleratutako oharrari erantzun diote. Udalari esan diote ez dituela baliabideak jarri.
Azken asteburuetako gauetan izandako gertakariak hizpide izan ditu Oiartzungo EAJk. Esan dutenez, tabernak itxi ondoren jende pilaketak sortzen dira, “alkohola edanez eta inolako osasun neurririk hartu gabe”. Musika altu jartzen dutela esan dute, hainbat bizilagunen loa galaraziz.
Sortuk publiko egindako oharrari erantzun diote, eta kritikatu dute Ertzaintzari errua bota izana. “Oiartzungo EAJ-tik argi esan nahi dugu onartezina iruditzen zaigula Sortuk egiten duen gazteriaren kriminalizazioa; Oiartzungo gazteriaren gehiengo handi batek txalotzeko jokabidea erakutsi du pandemia osoan zehar eta ez dauka inongo zerikusirik larunbatean gertatutakoarekin, beraz ez du zaku berean sartzerik merezi”, adierazi dute.
Sorturi egotzi diote Ertzaintza eta Eusko Jaurlaritzari “eraso eginez” etekin politikoa lortu nahi izatea. “Nahiz eta horretarako”, jarraitu dute, “istiluak sortzen dituztenen alde jarri, gauzak behar bezala egiten dituen herriaren aurka, beraz”.
Udalaren hitzak ere hizpide izan dituzte. Herriko hainbat txokotan udaltzainak jartzea konponbidea ez dela esan zuen udalak. “Argi dagoena da asteburuz asteburu gauzak okertuz joan direla eta Udalak ez duela ezer egin gertakari larriak iritsi diren arte. Ez dira behar diren baliabideak jarri Udaltzaingoak bere lana baldintza egokietan egin ahal izateko”, esan dute.
Horrez gain, udaltzain batzuek “erasoak” jasan dituztela nabarmendu dute, “udalaren babes garbirik jaso gabe”.
Bukatzeko, EAJk bere konpromisoa eta babesa eman die oiartzuar guztiei, pandemiak nekea eragin duela jakitun baitira. “Gauzak hobetzen doazen honetan denon azken esfortzu bat eskatzen dizuegu denon mesedetan”, gaineratu dute.
Udal gobernuari eskatu diote erantzukizuna har dezan istiluak errepika ez daitezen.
