Bere lana azaleratuta, Ansa profeta izan da jaioterrian
Iratxe Ansak, Igor Bacovichekin batera, 'Al desnudo' obra eskaini du, Lekuonako Sorlekua aretoa estreinatzeko. Txalo zaparrada handia jaso dute.
Bacovich eta Ansa, ikuskizunaren hasiera aldean. Iritsi zen eguna. Atzo arratsaldean estreinatu zuten Lekuona Fabrikako Sorlekua aretoa. Iratxe Ansa errenteriarrak eta Igor Bacovich bere bikotekideak osatzen duten Metamorphosis Dance taldearen Al desnudo ikuskizina izan zen aukeratutako lana.
Ohorea alde bikoa izan zen. Inguruan antzeko ezaugarririk ez duen aretoa inauguratzeko aukera izan zuen Ansak. Bueltan, errenteriarrek iaz Espainiako Dantza Sari Nazionala lortu zuen dantzariaren lanarekin gozatu ahal izan zuen. Ansak hamarkadak daramatza jaioterritik kanpo bizitzen; bere auzoan hasi zen dantzan, Ereintzaren lokaletan.
Ikusmina zegoen. Ilara egiteko ezin aproposagoa den Lekuonako egurrezko zubian pilatzen joan ziren ikusleak, hitzordua hasi baino ordu erdi lehenago.
Errenteria-Oreretako eragile politiko, ekonomiko, sozial eta, noski, kulturalen ordezkariek bete zituzten Sorlekuaren eserleku mailak. Ongietorria eman zien kea, iragan hurbileko oroitzapen txarra baino, ikuskizuna girotzeko ezinbesteko elementu izan zen.
Edukiera legeak uzten duena bezain beste beteta, Ansa eta Bacovichek oholtzara jauzi egin zuten. Iazko itxialdian ondutako Al desnudo-ren lehenengo zatia klasikoagoa den musika baten gainean oinarritu zuten.
Bigarren zatiak, berriz, musika modernoago bat izan zuen ardatz. Ansak Alemanian urte asko pasatu zituenez, analogia egite aldera: Kraftwerkek urratutako bidean sortutako musika, noizbehinka Rammsteini zera industriala lapurtu izan balio bezala. Argi jokoek ere garrantzia handia izan zuten Metamorphosisen lanean, baita zuzenean pantailaratutako streamingak ere.
Ordubete inguruko dantza saioa izan zen eman zutena, eta bukatzean txalo zaparrada jaso zuten dantzariek. Agertoki handietan ematen diren txalo zaparrada izan zen: luzea eta sentimenduz betetakoa. Sorlekua hala izateko bokazioarekin sortu delako: areto handia.
Ansa profeta izan zen bere herrian, eta eskertza bezala, senide gazte batek lore sorta igo zion zaparradan. Gaur, 20:00etan, berriro eskainiko dute Al desnudo; sarrerak agortuta daude.
Metamorphosis dantza taldearekin hasi da Lekuonak irudikatu nahi duen Errenteria-Oreretaren metamorfosia. Oiartzun ibaiaren ertzeko eraikina izango da ontzia, eta kultura, iparrorratz.
Beren lana azaleratzeko eguneroko inurri lanean dabiltzan sortzaileak ez dira faltako; hangoak, hemengoak, hara joandako hemengoak zein hemendutako hangoak. Fase berri bat hasi da.
-
- Argi eta zuzeneko irudiek pisua dute dantza ikuskizunean.
-
- Lore sorta bat eman zioten Ansari.
