Bi oiartzuar, Azkue Literatur Sarietako palmaresean
Haurtzaroko Maren Herrerak eta Ane Mujikak aipamena lortu dute Euskaltzaindiaren literatur sariketan. Haurtzaro izan da lan gehien aurkeztu duen ikastetxea.
Sarituak, Euskaltzaindiko, BBKko eta epaimahaiko ordezkariekin.
Euskaltzaindiak Resurreccion Maria Azkue Sariak banatu ditu gaur. Gazteei zuzendutako literatur lehiaketan bi oiartzuar daude epaimahaiak nabarmendutakoen artean: Maren Herrera eta Ane Mujika.
Biek ala biek A kategorian lortu dute saria, 10 eta 13 urte arteko gaztetxoek parte hartzen duten mailan, zehazki. Herrerak narrazio alorrean hirugarren postua lortu du, Kolore dantza kontakizunarekin.
Mujikak, berriz, postu bera lortu du, olerkigintza alorrean. Bakardadea titulua jarri dio bere idazlanari. Herrera eta Mujikaren ikastetxea —Haurtzaro Ikastola— izan da sariketara lan gehien aurkeztu dituena. 353dik 150 Oiartzungo hezkuntza zentroko ikasleenak izan dira.
Euskaltzaindia 1991n hasi zen Azkue Sariak banatzen. Ordura arte, Bilboko Aurrezki Kutxak antolatzen zuen, helduentzako. Orain BBKrekin elkarlanean antolatzen dute.
A mailako epaimahaikideak Miren Billelabeitia, Igone Etxebarria eta Manu Lopez Gaseni izan dira. Esan dutenez, aurtengo lanak “positiboagoak” izan dira oro har. “Eskola-jazarpenak eta antzekoek atzera egin, eta esan daiteke bizitza, itxaropena, etorkizuna… nagusitu direla eskuartean erabili ditugun idatzietan”, esan dute.
