Txinalkak aurten landu duen antzezlana ikusteko ez da gehiegi itxoin behar
Oiartzungo helduen antzerki eskolak bi saio eskainiko ditu igande arratsaldean. 'Itxoiten' antzezlana taularatuko dute. Sarrerak, txokolategian salgai.
‘Itxoiten’ antzezlanaren kartela, Idoia Beratarbidek sortutakoa.
Txinalka helduen antzerki taldeak ikasturte bukaerako emanaldia eskainiko dute datorren igandean, hilak 6. Bi saio egingo dituzte, 18:00etan eta 20:00etan, COVID-19ak baldintzatuta. 2020/2021 ikasturteari ginga jarriko dion saioa izango da.
Aurtengo antzezlanak Itxoiten du izena. Lur Kortak dinamizatzen du Txinalka antzerki taldea, eta azaldu duenez, iaz sortutako ideia batean oinarritu dira. “Tessa Andonegirekin abiatu zen ideia da, eta aurtengo ikasturtean biribildu dugu, lekuko hori hartu dut”, esan du Kortak.
Izenburuak esaten duen bezala, itxaronaldiak irudikatzen dituzten hainbat egoera islatuko dituzte, udaletxeko areto nagusiko oholtzan. Edukiera 30na pertsonara mugatuta dagoela gogorarazi du Kortak.
Komedia izan gabe, “umore ukitu asko” dituela iragarri du. Sarrerak bihar —asteazkena, hilak 2— jarriko dituzte salgai, txokolategian, bost euroan.
Honako aktore hauek taularatuko dute Itxoiten:
- Pili Arbelaitz.
- Malen Elizasu.
- Malen Frantsesena.
- Jesus Gonzalez.
- Nati Gonzalez.
- Amaia Ibarguren.
- Izaskun Llona.
- Marga Maritxalar.
