Agintaldiaren erdialdera iritsita, egindakoaren berri eman du Errenteriako PSE-EEk
Aldizkaria egin du Errenteriako PSE-EEk agintaldiaren lehen erdian egindakoak jendartean zabaltzeko. Etxez etxeko banaketarekin hasi dira jada.
Isaac Palencia, PSE-EEren udal taldearen eleduna. Bi urte pasatu dira udal hauteskundeak egin zirenetik, beraz, agintaldiaren erdialdea iritsi da. Bi urteko epean egindakoen berri emateko aldizkaria egin du Errenteriako PSE-EEk. Errenteriarren postontzietan banatzen ari dira. Elebitan dago.
Isaac Palencia PSE-EEren udal taldearen eledunak adierazi du aldizkariarekin gardentasunean eta herritarrenganako hurbiltasunean eragiteko asmoa dutela. Aldi berean, herritarrei harrera egiteko prest agertu da, euren kezka eta iradokizunak jasotzeko. Eledunak azaldu du bi urte zail izan direla, COVID-19agatik: “Herritar batzuk, zoritxarrez, utzi gaituzte. Beste asko birusaren ondorioak jasaten ari dira, horien artean dendak eta ostalaritza guneak”.
Aldizkarian, Palenciak zehaztu duenez, PSE-EEk aurrera eramandako hainbat proposamen eta egitasmo jasota daude (beheko estekan aldizkari osoa PDF formatuan jaso daiteke). Horiek harremana dute COVID-19aren gaineko laguntzekin, hirigintza lanekin, edo gizarte ekintzekin. “Gainera, EH Bilduren gestioa kritikatzen da aldizkarian. Azaldu dute gai askotan ez daudela Errenteriak behar duenaren altuerara”. Horren barruan, Lekuonaren gaineko “gestio txarra” irudikatu dute.
Palenciak zehaztu du Errenteriaren alde eta herritarren ongizatearen alde lan egiteko konpromisoarekin jarraituko dutela.
