Nagore Legarretaren argazki saioak, atzeratuta
'Gorputzen errebuelta' bihar arratsean egitekoak ziren, baina azken orduko arazoak egon dira. Gaur, 'Andrezaharraren manifestua"; bihar, Alaiartekin.
Nagore Legarretaren laneko argazkietako bat, partzialki moztuta, sare sozialetako zentsura saihesteko.
Bihar arratsaldean, 21 aulkiren barruan, Nagore Legarretarekin saio pare bat egitekoak ziren. Lehenik, iazko Gorputzen errebuelta saioan parte hartu zuten emakumeei argazkiak emango zizkien. Ondoren, saio berri bat egitekoak ziren, 50 urtetik gorako andreekin.
Azken orduko arazo batzuk direla eta, bertan behera geratu dira. Aurrerago egingo dira; data ez dute oraindik zehaztu. Pasa den asteko saioetako bat ere bertan behera geratu zen. Badirudi aurtengo zikloak 13 aulki izena izan behar zuela…
Beste ekitaldiak, aurrera
Gaur arratsaldean Andrezaharraren manifestua irakurraldi performatua eskainiko dute Mari Luz Esteban, Ainhoa Alberdi, Iraia Elias, Jurdana Otxoa, Idoia Beratarbide eta Miriam Ubanetek, udaletxeko areto nagusian.
Biharko, berriz, Alaiartekin mosaiko tailerra egingo dute Ehuntze espazioan, 10:00etan hasita.
