San Pedroko babes ofizialeko etxebizitzak zozkatzeko oinarriak onartu dituzte
Guztira 39 etxebizitza eraikiko dituzte, eta izen ematea lurralde historikoko aldizkarian oinarriak argitaratzerakoan ahalko da egin.
Belaskoko babes ofizialeko etxebizitzen zozketan izen emateko oinarriak onartu dituzte. Pasai San Pedroko Belasko inguruko lurretan babes ofizialeko 39 etxebizitza eraiki behar dituzte. Gaurko udalbatzarrean zozketarako oinarriak onartu dituzte, PSE-EEk eta EAJk hala bozkatuta.
Etxebizitza horien zozketan izena emateko oinarri nagusia pasaitarra izatea dela azaldu du udalak. Horretarako, gutxienez azken bi urteetan udalerrian erroldatuta egotea edota azken 10 urteetan 5 urtez erroldaturik egotea beharrezkoa izango da.
Izena emateko eguna oraindik ez dute esan noiz izango den. Lurralde historikoko aldizkarian oinarriak argitaratu eta hurrengo egunean ahalko dela izena eman aurreratu dute bakarrik.
Guztira 39 etxebizitza eraikiko dituzte, horietatik 26 bi logelatakoak izango dira, eta 13 hiru logelatakoak. Xehetasun gehiago ere eman dituzte, izan ere, hiru logela dituzten etxebizitzetatik bi mugikortasun urria duten pertsonentzako egokituta egongo dira, eta lehenik haien artean zozkatuko direla azaldu dute.
Bi logela dituzten 19 etxebizitza 1986. urtea eta gero jaio direnentzat gordeko dituztela aurreratu dute. Nahikari Otermin Hirigintza zinegotziaren hitzetan gazteriarentzat arazoa da etxebizitza bat lortzea, eta uste du honek ez duela arazoa konponduko baina askori lehen etxebizitza erosten lagunduko diela du iritzi.
EH Bilduk eta Elkarrekin Podemosek zuzenketak aurkeztu dituzte batera. Sustapen horietako bi etxebizitza udalak erostea proposatu dute, eta bestetik, guraso bakarreko eta genero indarkeriaren biktima diren emakumeak kontuan hartzea eskatu dute, esleipen irizpideetan hauek aintzat hartuz eta bi etxebizitza erreserbatuz.
Oterminek “denbora eta bideragarritasun falta” egotzi die oposizioko alderdien zuzenketari, eta udal gobernuaren bozekin atzera bota dute EH Bildu eta Elkarrekin Podemosen zuzenketa. Oposizioaren ustez, “Oterminek kolektibo ahulenekin duen sentsibilitate eskasaren sintoma” da zuzenketa alde batera uztea.
