Donibanen elkarbizitza eta garbitasuna bermatzeko neurriak proposatu ditu EH Bilduk
Koalizioaren ustez, iazko udaran udalak ez zuen jakin herritarren elkarbizitza kexei erantzuten. Udal zerbitzu publikoen kalitatea hobetzeko hainbat proposamen egin dituzte.
Donibanen elkarbizitza eta garbitasuna bermatzeko neurriak proposatu ditu Eh Bilduk Udan Donibanen espazio publikoa “elkarrekin eta errespetuan partekatzeko” hainbat proposamen egin dizkio EH Bilduk udal gobernuari.
Mikel Garcia eta Xabier Alegria bilkideen ustez, iazko udaran udalak ez zuen jakin herritarren elkarbizitza kexak behar bezala aditzen eta egoera berrietara moldatzen. “Herritarren premia larrienei erantzun behar diegu, zorrotz eta garaiz”, adierazi dute.
Proposatu dituzten neurrien artean, musukoa erabiltzen dela bermatzeko, eta herritarren eta bisitarien arteko elkarbizitza hobetzeko, udaltzainak oinez bertaratzea eskatu dute.
Oinezkoei lehentasuna ematea ezinbestekotzat jo du koalizioak. Horretarako, Donibane kalea trafikoari guztiz ixtea astegunetako 15:00tatik 20:00 bitarte, eta igandeetan egun osoz planteatu dute. Bizkaia plazako aparkalekuak herritarrentzat bakarrik izatea ere nahi dute EH Bilduko hautetsiek.
Garbiketa alorrean, Alde Zaharreko komun guztiak zabaltzea, eta puntetako bidean dagoena konpontzea eta irekitzea eskatu dute. Aldi berean, igandetarako garbiketa txanda berezia ezartzea beharrezkoa dela uste dute Garciak eta Alegriak.
Motoran lehentasuna Donibanetik San Pedrora egunero joaten direnei ematea exijitu dute, beraien ustez herritarrek jasan behar dituzten ilara luzeak ekiditen lagunduko du. MUGI integratzen ez den bitartean, pasa txartela osatzea ere egiteke dagoela azaldu du EH Bilduk.
Arrokaundietari buruz esan dute, pilaketa handiak sortzen diren lekua denez, eguerdi eta arrats partean udaltzainak bertatik pasatzea ongi legokeela. Modu horretan, mahaien erabilera, zaborra eta bestelakoak kontrolatuta egongo direla dute iritzi.
