EH Bildu: "Udal idazkariari 12,997,60 euroko soldata gehigarria jarri dio udal gobernuak"
Soldata gehigarri hori San Markos Mankomunitatean lan egiteagatik jasotzen zuen, baina udal gobernuak erabaki du bere gain hartzea soldata gehigarri hori.
EH Bilduk salatu du "esklusibotasunagatik" igo diotela soldata udal idazkariari. Lezoko EH Bilduk jakitera eman duenez, udal idazkariak San Markos Mankomunitateko lana utzi du, eta 12.997,60 euroko soldata gehigarria jarri dio EAJ-PSE gobernu taldeak.
Orain arte, soldata gehigarri hori San Markos Mankomunitatean lan egiteagatik jasotzen zuen, baina udal gobernuak erabaki du bere gain hartzea soldata gehigarri hori eta guztira 77.978,79 euro irabaziko ditu udal idazkariak. Udal idazkariari %100eko lanaldiagatik %120 ordainduko diotela argitu dute abertzaleek.
EH Bilduk dioenez, ez da lehen aldia arrazoitu gabeko langileen soldata igoera egin dela. Azaldu dute, udal kontu hartzaileari 7.198,71 euroko gehigarria jarri ziola EAJ-PSE gobernu taldeak.
Kasu honetan, ardura edo zeregin gehigarririk gabe igo ziotela soldata salatu du koalizioak. Hortaz, udal kontu hartzaileak %100eko lanaldiagatik %113ko soldata jasotzen duela eman dute jakitera abertzaleek.
Igoera horien arrazoiak zeintzuk ziren galdegin zien EH Bilduk udal gobernuari, eta abertzaleen hitzetan, EAJ-PSEk “esklusibotasunagatik” igo ziela soldata erantzun zuen.
EH Bilduk salatu du arrazoia faltsua dela. Udal langileren batek udaletik kanpo lan egin nahiko balu, Osoko Bilkuraren baimena behar lukeela ziurtatu dute. “Ez dago esklusibotasuna ordaindu beharrik,beraz” zehaztu dute.
2012ko urtarrilaren 26an egin zen Osoko Bilkuran erabaki zuten udal idazkariaren jarduna bateragarria zela San Markos Mankomunitateko zereginekin.
Udalaren baliabide ekonomikoak herritarren beharrei erantzuteko daudela oroitarazi die EH Bilduk gobernu taldekideei. Kudeaketa arduratsua, gardena eta zintzoa eskatu diote EAJ-PSEri.
