Espazio publikoan nola sentitzen diren azaleratu du Anunciata ikastetxeko neska talde batek
Herritik jarri dituzten kartel batzuen bidez, "inguru konprometitua, ahaldundutako gazteak" komunikazio kanpaina egin dute. Neska taldeak herritarrak kontzientziatu nahi izan ditu, adi egon daitezen komunitate gisa.
Anunciata ikastetxeko neska talde batek komunikazio kanpaina egin du Pasai Antxotik. Emozioak, gorputza eta lurraldea landu dituzte Antxoko La Anunciata ikastetxeko 3. DBHko neska talde batek. Pasaiako Udalaren Eskubidean planaren barruan jorratu dute lanketa, Betania Mendoza gorputz eta dantza terapietan aditu denarekin eta Izaro Mariezkurrena sortzailearekin.
Egunerokotasunean ingurua, hau da, espazio publikoa nola sentitzen duten azaleratu dute prozesu honetan ikasleek. Horretarako, zer sentitzen duten eta gorputzean nola eragiten duten sentimenduek ikasi dute. “Helburua zen taldea eguneroko bizitzako inguruneetan gertatzen zaienari buruzko hausnarketa egiteko gai izatea”, azaldu dute Mendozak eta Mariezkurrenak.
Inguru konprometitua, ahaldundutako gazteak izena jarri diote kanpainari, eta herrian zehar hainbat kartel jarri dituzte antxotarrak kontzientziatzeko.”Ez dugu kalean egoteko gogorik gabe geratu nahi”, esan dute ikasleek.
