Oarsoaldeari itzuli 'transmarikabolloa', E28aren bezperatan
Harrobira egingo dute hilaren 26an, eskualdeko herri guztiak zeharkatuko dituzte bizikletaz, Donibanetik San Pedrora. Geldialdi bakoitzean zerbait berezia prestatu dute.
Iazko LGTBIQ+ Harrotasun Egunaren bueltan egindako jardueretako bat. Frantziako Tourra —gizonezkoena— egun gutxi barru hasiko da. Kazetaritza klixeek aspaldi izendatu zuten Suge koloreaniztuna izengoitiarekin. Koloreaniztasuna eta bizikleta uztartuko ditu Harrobira izeneko bizikleta martxak, erlazio sexual edota afektiboetan kolore guztiak baliogarriak direla aldarrikatzeko.
Ekainaren 26an, LGTBIQ+ Harrotasun Eguna baino bi egun lehenago, Oarsoaldea zeharkatuko dute, eskualdeko Kuku Taldeak antolatuta. Dirudienez, inguruotan emakumeak gustuko zituzten emakumeei kuku deitzen zieten.
Donibanen hasiko dira pedalei ematen, 10:00etan, eta San Pedron bukatuko dute, bakoitzak eramandako bazkari batekin.
Bitartean, Oarsoaldeko herri eta barrutietan geratuko dira, eta txoko bakoitzean ekitalditxo bat egingo dute. Luzeena Errenteria-Oreretakoa izango da, ibilbidearen erdialdean, hamaiketakoa egingo baitute hor.
Bizikleta martxa lagunkoia
Antolatzaileek adierazi dutenez, “transmarikabolloei zuzendutako ekintza aldarrikatzailea” izango da. Hala ere, heterofriendly izango dela ziurtatu dute.
Bizikleta martxaren ezaugarri lagunkoi bakarra ez da hori izango. Argi utzi dute ez dela kirol jarduera bat izango, ez direla lehian edo ziztu bizian ibiliko. Ibilbidearen edozein puntutan sartu edo atera daitekeela jakinarazi dute (gutxi gora beherako ordutegia, behean). Pedalak gotti-betti ibili nahi ez dituenei eskatu diete beren herriko jarduerara hurbiltzea, hala nahi izanez gero.
Eraman beharrekoak zerrendatu dituzte: kaskoa, maskara, janaria eta edaria. Furgoneta bat egongo da ibilbide guztian, parte hartzaileei laguntza emateko, hala behar izanez gero.
Ibilbidea
- Donibane: 10:00etan.
- Lezo: 10:30ean.
- Oiartzun: 11:30ean.
- Errenteria-Orereta: 12:00etan.
- Antxo: 13:00etan.
- Trintxerpe: 13:45ean.
- San Pedro: 14:00etan.
