Bi asteburuz jarraian estropadak Pasaian
Bihar, erlojuz kontra arituko dira Sanpedrotarrak Arraun Elkarteak antolatutako estropadetan ETE, KAE1 eta KAE2ko arraunlariak. Datorren igandean ere hala izango da, San Juan Koxtape Arraun Elkarteak antolatu duelarik.
Bihar, ekainak 19, Pasaiako XXXVI. Ikurrina jokatuko dute KAE1 ligako eta KAE2 ligako arraunlariek Pasai San Pedron. Egun berean, ETE ligako arraunlariak Tolosaldeko II. Ikurrina lortzeko lehian arituko dira. Hala azaldu du Jose Manuel Oiarbide Sanpedrotarra Arraun Elkarteko ordezkariak. Hiru liga horietako sasoiko lehen estropadak izango dira. Pasaian abiatuko da, beraz, ligen denboraldi ofiziala.
Bi estropada hauek Sanpedrotarra Arraun Elkarteak antolatu ditu. Arratsaldeko 17:00etan hasiko dira lehiaketak, eta erlojuz kontra jokatuko dute. Banaka aterako dira traineruak eta irteerak minutu bateko tartearekin burutuko dira. Hala, 17:00etan ateratzen hasiko dira ETE Ligako hamaika traineruak; 17:30ean izango da KAE2koen txanda, hamar ontzirekin; ondoren, 18:15ean, KAE1ekoen lehia hasiko da.
Emakumeen 11 traineruek, 2 luze eta ziaboga 1 egin beharko dituzte. Gizonezkoen KAE1ko 13 traineruek eta KAE2ko 10 traineruek, 4 luze eta 3 ziaboga gauzatu beharko dituzte.
Osasun neurriak baretu direla, baina “arduratsuak izaten jarraitu” behar dugula gogorarazi du Izaskun Gomez alkateak. Oiarzabalek ikusleei eta zaleei eskatu die talde handietan ez gerturatzeko estropadak ikustera.
Oarsoaldeko eta Bidasoko traineruei dagokienez, KAE1 ligan San Juanek eta San Pedrok hartuko dute parte. KAE2 ligan, aldiz, Hibaika, Hondarribia B eta Trintxerpe-Ilunbek. ETE ligan egongo dira lehian Hibaika eta San Juan.
Datorren iganderako, hilak 27, San Juan Koxtape Arraun Elkarteak estropadak antolatu ditu ere. Emakumeek Pasaiako IX Ikurrina jokatuko dute goizeko 11:20tan, eta KAE1 ligako gizonek V. Adegi – Fabrika Bandera irabazteko arituko dira jokoan goizeko 12:00tan.
