Lezoko Hiri Mugikortasun Planean herritarrek ekarpenak egin ditzakete
Ekarpen horiek udal webgunean ezarrita dagoen inkesta bidez jasoko ditu udalak. Uztailaren 1era arteko epea dago galdetegia betetzeko.
Lezoko Udala Hiri Mugikortasun Plana egiten ari da. Horren harira, lezoarrek bertan ekarpena egiteko aukera izango dute udalaren webgunean prestatu duten inkesta baten bitartez. Klik egin hemen inkestara joateko. Uztailaren 1era arteko epea dago inkesta betetzeko.
Honen aurretik, plana gauzatzeko hainbat urrats egin dira. 2020ko azken asteetan, adibidez, plana idazten ari den enpresak hainbat galdeketa egin zituen herrigunean, ibilgailuen gidariak tartean zirela. Gainera, herriko hainbat eragilerekin jada egin dituzte bilerak.
Egungo egoeraren diagnosia egin ondoren, aurrera begirako gogoeta partekatua nahi du egin udalak. Horregatik nahi du lezoarren iritzia jaso. Udalak zehaztu du galdeketako informazioa modu anonimoan aztertuko dela.
