Adinberri Trintxerpen kokatzeko planeamendu aldaketa, aho batez
Pasaiako Udalean ordezkaritza duten alderdi guztiek bat egin dute Hospitalilloko eremuan adinekoentzako zentroa eta lurpeko aparkalekua eraiki ahal izateko.
Adinberri zentroa eta lur azpiko parkinga Hospitalilloko eremuan eraikiko dituzte. 
Aho batez eman zion baiezkoa atzo udalbatzak Adinberri Trintxerpen kokatzeko egin behar den planeamendu aldaketari. Hasierako onarpenak bidea irekiko dio Hospitalilloko eremuan egitea aurreikusita dagoen adinekoentzako zentroa eta lurpeko parkinga sortzeko prozesuari.
Izaskun Gomez alkateak atzoko osoko bilkuran nabarmendu zuen eraikuntza horiek egikaritzeak 400 lanpostu baino gehiago sortzea suposatuko lukeela, aparkatzeko arazoak konpondu eta Trintxerpeko urbanizazioaren berritzea inpultsatzearekin batera.
EH Bilduko bozeramaile Iraitz Pazosek hitza hartu zuen udalburuaren ondoren zehazteko, hain zuzen, atzoko onarpen hura prozesu luze baten hastapena besterik ez dela: “Argitu beharko litzateke jendearen aurrean gaurko onarpena ez dela obraren hasiera eta oraindik gauza asko falta direla noizbait Adinberri egina ikus dezagun”.
Hori argituta, Gomezek lehenago adierazitako asebetetzearekin bat egin zuen bilkideak, akordioak pasaitarrentzat onura asko ekar ditzakeela sinetsita baitago. La Herrerako lurren zaharberritzea hartu zuen ahotan: “Udalak, behingoz, portuak hain abandonaturik dituen La Herrerako lurrak berreskuratzen hasteko lehen urratsa izan daitekeelako hau”. Horrela, koalizioaren ustez “degradatua” dagoen espazio bat herriarentzat berreskuratuko litzateke.
