Gure Eskuk datozen egunetako agendaren berri eman du
Larunbatean Bilbora joateko deia egin dute, Hamaika Garak antolatutako mobilizaziora. Ostiralean mahaia jarriko dute plazan, Aiako Harriko ekitaldiarekin lotuta.
2019ko irailaren 19an Donostian egindako manifestazioa. Oiartzungo Gure Eskuk datozen egunetarako hainbat zita jarri ditu. Erabakitzeko eskubidearen aldeko mugimenduak larunbatean —hilak 3— Bilbon egingo den mobilizaziora joateko deia luzatu du.
Hamaika Gara iniziatibak Bizkaiko hiriburuko Areatzan egingo du mobilizazioa. 17:30etan hasiko da, udaletxeko zubian eta Areatzakoan eta biak batzen dituzten pasealekuetan.
Bezperan —ostiral honetan— Gure Eskuk mahaia jarriko du Oiartzungo plazan. Aiako Harriko ekitaldiarekin zerikusia duten kudeaketak egiteko aukera egongo da: izena emateko, enkargatutako kamisetak jasotzeko, kamisetak eskatzeko, erreferendumaren alde sinatzeko…
Datorren asterako beste bi zita jarri dituzte. Ostiralean —hilak 9— mahaia jarriko dute berriro plazan. Larunbatean, berriz, Aiako Harria berriro argiztatuko dute. 21:00etan piztuko dituzte argiak, baina igotzeko 18:30ean geratu dira, Arritxulon.
Izena eman beharko da lehenengo, webgunearen bitartez. Bost euroko prezioa izango du, aseguruarena. Ekintza ikusgarri horri buruzko informazio gehiago, esteka honetan.
