[Erreportajea] Kantxan arerio, herrialdeen loturak estutzeko
Euskal Herriko selekzioak eta Valentziakoak joko zuzenetako partidak jokatuko dituzte asteburuan, Oiartzunen. Kirol harremanak elkartasun keinu batean du oinarri.
2016an Beheko Plazan egin ziren topaketen irudia. Bihar eta etzi joko zuzeneko nazioarteko partidak jokatuko dituzte Oiartzunen. Euskal Herriko selekzioak Valentziakoaren bisita jasoko du. Bi herrialdeen arteko hirugarren topaketa izango da. Lehena duela bost urte egin zuten, Oiartzunen; bigarrena, Benidormen eta hirugarrena iaz egitekoak ziren. Joxe Mari Mitxelena oiartzuarra da euskal selekzioaren hautatzailea, eta harremanaren berri eman du.
1928an sortu zen Eskuzko Pilota Jokoen Nazioarteko Konfederazioa (CIJB, bere siglengatik). Hurrengo urtean sortu Euskal Pilotaren Nazioarteko Federakuntza, lehenengoak erremintazko modalitateak onartzen ez zituelako. Bietan Espainiako zein Frantziako selekzioaren aterkiaren pean jokatzen dute euskal herritarrek.
2015ean, CIJBk Hego Euskal Herriko pilotariak gonbidatu zituzten Herbehereetako txapelketa batean parte hartzeko. Selekzio bereko gainontzeko pilotariak valentziarrak ziren; haiek uko egin zioten Espainia bezala jokatzeari, Euskal Herriak joka zezan. «2016an Euskal Herria bezala onartu zigutenean, aitortza moduko bat egin genien valentziarrei, esker ona azaltzeko. Lehenengo topaketa egin genuen urte hartan». Izan ere, Mitxelenarentzat, Valentziak «izugarrizko apustua» egin zuen Euskal Herriak joka zezan. «Kirol arazoa baino, arazo politikoa da selekzioaren ofizialtasunarena. Valentzian, adibidez, pilota indartu nahi dute, eta gobernuak sortu du zuzendaritza bat pilota sustatzeko. Generalitateko Kirol zuzendariaren maila hierarkiko bera du».
Joko zuzenak Europa, Asia eta Amerikan jokatzen direla nabarmendu du Euskal Herriko hautatzaileak. Joko eta araudiei dagokienez, ez dago ezberdintasun handirik; bakarra, pilota da. Euskal Herrian 90-100 gramokoarekin jokatzen da, eta nazioartean 30ekoarekin.«Nazioartean pisua hogeita hamar gramokoa denez, horrekin jokatuko dugu. Munduan badaude 21 herrialde jokatzen dutenak gure bote luzean bezala; gu gara bakarrak pilota pisutsuak dituztenak. Kolonbian hirurogeita hamarrekoarekin jokatzen dute. Pelota goxo-goxoak dira, baina beraien besoak eta eskuak ohituta daude. Guk moldatu behar dugu». Munduko Txapelketarako entrenatzeko komeni zaiela gaineratu du Mitxelenak. Partida guztiak jokatuko dituzte pilota arinagoekin, etziko pasakakoa izan ezik. Bi hilabete daramate entrenatzen, Beheko Plazan; asteazkenetan neskak eta ostegunetan mutilak.
Mitxelenak kanpoko pilotarien maila nabarmendu du. «Valentziako Altuna edo Artola balira bezala da», alderatu du. Euskal Herriko selekzioa herrialde guztietako pilotariek hornituko dute, tartean Oiartzungo neska batek.
EGITARAUA
Bihar, larunbata, hilak 3
- 10:30ean: gizonen bote luze partida.
- 12:00etan: emakumeen plaza libreko partida.
- 13:00etan: gizonen plaza libreko partida.
- 17:00etan: emakumeen mahai jokoko partida.
- 18:00etan: gizonen mahai jokoko partida
Etzi, igandea, hilak 4
- 11:00etan: Emakumeen pasaka eskuz partida.
