Zuzeneko pilotaren lagunarteko nazioarteko txapelketa asteburuan, Arroitajauregiren omenez
Euskal Herriko selekzioak eta Valentziakoak joko zuzeneko partidako jokatuko dituzte asteburuan Oiartzunen.
Madalensoron izango da lagunartekoa asteburuan. Bihar eta etzi joko zuzeneko nazioarteko partidak jokatuko dituzte Oiartzunen. Euskal Herriko selekzioak Valentziakoaren bisita jasoko du. Bi herrialdeen arteko hirugarren topaketa izango da. Lehena duela bost urte egin zuten, Oiartzunen; bigarrena, Benidormen eta hirugarrena iaz egitekoak ziren. Topaketa hau, Euskadiko Euskal Pilota Federakuntza (EPF) eta Federaciò de Pilota Valencianaren (FPV) elkarlana ”erakusteko eta estutzeko” aukera paregabea dela esan dute gaurko aurkezpenean. Hala, lehenik, ”elkarlanaren emaitzak eskertzeko” oroigarri bana eman die Iosune Cousillas Kirol eta Kultura zinegotziak bi federazioetako lehendakariei.
Bi federazioen harremanak fruituak izan dituela baieztatu du Jesus Leonet Elizegi alkateak gaurko agerraldian, ”Europako eta Munduko Txapelketetan” presentzia izan baitute bi herriek. Mundu mailako lehiaketa gehiagotan parte hartu ahal izatea dela helburua nabarmendu du Leonetek. Elkarlanaz haratago, Txost elkarteari eskerrak eman dizkio ere lehiaketa antolatzeagatik.
Bihar hasi eta etzi amaituko den lagunarteko txapelketa hau, Kepa Arroitajauregi EPFko presidenteordearen heriotzaren harira egitea erabaki zuten, Gotzon ENbil EPFko lehendakariaren arabera. Arroitajauregi omenduko dute Madalensoro pilotalekuan, beraz. Aldi berean, jokalariek urrian eta azaroan jokatuko diren nazioarteko txapelketarako entrenamendu gisa hartuko dute lagunartekoa.
”Bi herri anai” batuko direla esanez hartu du hitza Jose Daniel San Juanek, FPVko presidenteak. Uste du ”hizkuntza propioa eta pilota” amankomunean dituztela bi herrialdeek. Gaineratu du, bi federazioek emakume eta gizon pilotariak dituztela eta honek are gehiago elkartu dituela.
Josep Miquel Moya Valentziako Generalitateko Kirol kontseilariak adierazi du ”ohorea” dela txapelketa hau aurkeztu ahal izatea, eta babesa erakutsi die bi taldeei aipatuz, Valentziako Generalitateak bat egiten duela bi selekzioen mundu mailako ikusgarritasuna lortzeko bidearekin. Bi federazioei, haien lanagatik eskerrak emanez amaitu du prentsaurrekoa Moyak.
ASTEBURUKO PARTIDAK
Bihar, larunbata, hilak 3
- 10:30ean: gizonen bote luze partida.
- 12:00etan: emakumeen plaza libreko partida.
- 13:00etan: gizonen plaza libreko partida.
- 17:00etan: emakumeen mahai jokoko partida.
- 18:00etan: gizonen mahai jokoko partida
Etzi, igandea, hilak 4
- 11:00etan: Emakumeen pasaka eskuz partida.
