Gure Eskuk Aiako Harriko ekitaldiari buruzko oharrak eman ditu
Aiako Harria argituko dute datorren larunbatean, eta izena eman behar dela gogorarazi dute. Ekitaldiko kamiseta eskura daiteke, eta janaria emateko eskatu dute.
Gure Eskuk ekitaldi ikusgarria prestatu du larunbaterako. Aiako Harria argiztatuko dute, eta horetarako prestaketa lanetan ari dira.
Izena eman behar dela gogorarazi dute, bost euroren truke. Aseguruarentzako izango da diru kopurua. Hori Internet bidez egin beharko da. Oiartzuarrak 18:30ean geratu dira, Arritxulo aterpetxean. Bertan, ordu horretatik aurrera, animazioa egongo dela adierazi dute.
Ekitaldirako kamiseta eskatu nahi izanez gero, txokolategian, Gure Eskuk ostiralean jarriko duen postuan edo online dendan egin daiteke.
Aiako Harrira inoiz igo ez bada, lehenago joateko aholkatu dute, ibilbidea ezagutzeko. Horrez gain, beste aholku batzuk eman dituzte. Honakoak dira:
- Ekipamendu egokia eraman: frontala (pilak kargatuta), mendirako arropa egokia…
- Afalordua bertan pasako dute, beraz, afaria eta edatekoa eraman behar izango da.
- Meteorologia arazoengatik edota iluntzeagatik aldaketak egon daitezkeela ohartarazi dute.
- Gauez jaitsiko dira, beraz, kontuz ibiltzeko eskatu dute. Arriskuak saihestu eta ingurukoei laguntzeko eskatu dute.