Klima aldaketa murrizteko plana osatzeko, herritarren ekarpenak bildu nahi ditu udalak
Datorren 10 urteetara begira, klima aldaketa gelditzeko eta honek eragindako inpaktuetara egokitzeko plan bat osatu nahi du udalak.
Klima aldaketa murrizteko plana idazteko, herritarren ekarpenak jaso nahi ditu udalak. On line galdetegi baten bidez, ekarpenak jaso nahi ditu udalak, klimaren eta energia iraunkorraren aldeko ekintza planean (KEIEP) jasotzeko asmoz. Plan hau datorren hamar urteetara begira idatziko da, eta helburua klima aldaketa murriztea eta honek dakartzan inpaktuetara egokitzeko gaitasuna sendotzea dela azaldu du Errenteriako Udalak.
Udalak uste du, herritarren inplikazio eta ekimena ezinbestekoa dela, beraz, herritarrei galdetegian parte hartzeko gonbita luzatu die. Aurrez aurre ekarpenak egiteko aukera ere egongo da, uztailaren 12an eta 28an egingo diren bi saioetan. Torrekua eraikinean izango dira biak ala biak, arratsaldeko 17:00tatik 19:00tara.
Horietan izena emateko, posta elektroniko honetara idatzi behar da zein egunetan joan nahi den zehaztuz, eta saioa online jarraitu nahi izanez gero, esteka honetan topa daiteke zuzeneko emisioaren esteka.
