'Oarso' aldizkariaren 56. zenbakiaren aurkezpena datorren ostiralean
Ia mende bat betetzeko atarian, 'Oarso' aldizkariaren 56. zenbakia kalean izango da datorren astean. Herritarren artean doan banatuko dute.
Lekuona Fabrika ikusi ahalko da aurtengo Oarso aldizkarian. Oarso aldizkariaren 56. zenbakia aurkeztuko dute kolaboratzaileen eta alkatearen artean, uztailaren 16an, 18:30ean Merkatuzarreko Jose Luis Caso aretoan. “Duela 90 urtetik hona eta ia etengabe, aldizkariak bete egin du errenteriarren bizitza kulturala islatzeko hasierako asmoa”, adierazi du udalak. Beste behin, herritarren hitzak bildu eta herri osoan zehar irakurri ahalko da ia auzo guztietan eskuratzeko aukerarekin.
Aldizkaria herriaren historia kontsultatzeko ezinbesteko tresna bibliografikoa bilakatu dela uste du Errenteriako Udalak. Izan ere, hainbat gairi buruz idatz daiteke bertan, adibidez, aurtengo edizioan, emakumeak lan munduan, teknologiaren ekarpena herrian edota Bigarren Errepublikako kulturari buruz egin dituzte artikuluak. Guztira 400 orrialde ditu, eta 50 kolaborazio baino gehiago topa daitezke.
Gainera, estreinakoz, memoria historikoari buruzko atala sortu dute. Bi biografia jaso dituzte, bata Josean Arbelaitzena eta bestea Sabin Lasarena, hurrenez hurren, Iñigo Imaz eta Mikel Zabaletak idatzi dituztenak.
Azalean Lekuona Fabrikaren argazkia ikusiko da, eta kontrazalean, udaletxean dagoen postontzia ageri da, 100 urte baino gehiago dituelako.
Aurkezpenera joateko, gonbidapenak lortu behar dira posta elektronikoz eskatuz edo 943 44 96 10 telefonora deituz. Eskuratzeko azken eguna uztailaren 15a da.
