Mugimendu feminista: "Has gaitezen botere harremanak deuseztatzen"
Oiartzungo Feministen Asanbladak deituta, elkarretaratzea egin dute Maria Pilar Berrio Jimenezen hilketa salatzeko. Indarkeria matxista lehen planora eramateko eskatu dute.
Hamarnaka lagunek salatu dute Murchanteko hilketa matxista. Oiartzungo Feministen Asanbladak deituta, elkarretaratzea egin dute gaur plazan. Maria Pilar Berrio Jimenezen hilketa matxista salatu dute. Herenegun hil zuten, seme-alaben aurrean, Murchanten (Nafarroa). Bere koinatu ohia atxilotu dute, ihesean 33 ordu egon ondoren, hilketa leporatuta.
Esan dute Euskal Herrian aurten gertatu den laugarren hilketa matxista ez dela kasualitatea. “Gure jendartea botere harremanetan oinarritzen da, hau da, sistematizatuta dago botere gehiago duten pertsonek gutxiago duten horien gaineko indarkeria”, adierazi dute, gizon batek emakume bat hil duelako.
Berrio Jimenezen izena ez dute nahi ahanzturan disolbatzea, eta adin txikikoen kontrako indarkeria ere azpimarratu nahi izan dute, hala izan delako.
“Haserretik eta minetik egin dugu gaurko deialdia”, jarraitu dute, “baina indartsu eta martxan gaudelako batu gara gaur hemen indarkeria kasu hau salatzeko, nahikoa dela eta nazkatuta gaudela adierazteko eta
emakumeok bizirik nahi garela oihukatzeko”.
Erakundeei deia
Instituzioei deia egin diete, beste behin. Indarkeria sexista beraien agendetan kokatzera deitu dituzte, eta lehentasuna izan dadila eskatu. Izan ere, mugimendu feministaren ustez, indarkeria sexista zein beste mota batzuetakoa ekidin daitezke asmo politikoarekin.
Hilketak salatu nahi dituztela gaineratu dute, baina ageriko zein ezkutuko indarkeriak ere. “Sistema bera arrakalatu eta denontzat lekua izango duen Euskal Herri bat nahi dugu”.
Horregatik, deia luzatu dute: “Has gaitezen gaurdanik feminismoan blaitzen, botere harremanak deuseztatzen eta sistema arrakalatzen. Antolatu gaitezen, saretu. Jar dezagun autodefentsa feminista martxan eta
batu gaitezen borroka feministara. Denok aske eta zoriontsu biziko garen herria behar eta merezi dugulako”.
