TicketBai euskaraz jartzeko eskatu dio udalak establezimenduei
Zerbitzu honekin ordainagiria euskaraz jasotzeaz gain, fakturak zuzenean bidaliko ditu Gipuzkoako Foru Ogasunera.
Oarsoaldeko udal guztiek babesten dute TicketBai zerbitzua euskaraz izan dadila. Laster, TicketBai sistema erabiltzea derrigorrezkoa izango dela lehendik ohartarazi zuten Oarsoaldeko udalek. Orain, zerbitzu hau aplikatzerakoan, euskarazko aukera duena jartzera bultzatu nahi ditu Lezoko Udalak establezimenduen jabeak.
Gaur egun, tiketa gaztelaniaz bakarrik jasotzeko aukera gehiengoek eskaintzen dute, ez hainbestek euskaraz edota gaztelaniaz eta euskaraz jasotzekoarena. Aplikazioan euskaraz inprimatzeko aukera ezartzea “komenigarria” dela babestu du udalak. Era honetan, Kontsumitzaileen eta Erabiltzaileen Hizkuntza Eskubideei buruzko 123/2008 dekretua beteko zela argitu dute.
TicketBai sistema ezartzeko, aplikazio informatiko bat instalatu behar da, eta horretarako, hainbat enpresek aplikazio desberdinak eskaintzen dituzte, udalak zerrenda bat argitaratu du aukera guztiekin. Ordainagiria euskaraz idazteaz gain, zerbitzu honek establezimenduen eta enpresen fakturak zuzenean bidaliko ditu Gipuzkoako Foru Ogasunera.
