[Galeria] Oiartzungo kale eta txokoak, artez eta moldez
Kulturabirusak ostiral arratsalde animatua utzi du Oiartzunen. Erakusketak, mosaiko tailerrak edo herri musika eta raparen arteko nahasketa izan dira.
Biyurrieneak eta Soinueneak antolatutako saioa. Kulturabirusak askotariko eskaintzan aukeratzeko (ala ez) gonbidapena egin zuen atzo arratsaldean. Esaterako, Arizmendienean Puskak biltzen erakusketa ikus zitekeen Arizmendienean, uztaila guztian bezala (hemen ikus daiteke parte hartuko duten artisten zerrenda).
Ez da egunotan ikusgai dagoen erakusketa bakarra. Udaletxeko pleno aretoan Burgosko Prozesuari buruzkoa ikus daiteke. Orduko testuingurua islatu dute erakusketa horretan; hilaren 18ra arte ikus daiteke.
Kalean, berriz, bi jarduera izan ziren. Labadero zaharrean, emakume talde bat Alaiartek diseinatutako murala mosaiko bihurtzen aritu ziren.
Bestalde, Elizalde Herri Eskolako pilotalekuan, nahasketa ustez kontraesankor batekin gozatzeko aukera izan zen. Rapa eta herri musika nahastu ziren, momentuan egiten ari ziren grafittiaren begiradapean. Soinueneak eta Biyurrieneak indarrak batzearen emaitza izan zen.
Gaur, ipuinak eta saskibaloia
Kulturabirusa ez zen atzoko egunera mugatu. Gaur goizean antzerki ahalduntze tailerra egiten ari dira Iturriotzen. Arratsalderako, berriz, saskibaloi txapelketa antolatu du Biyurrieneak. Izen-ematea itxita badago ere, Haurtzaroko kantxan giroa egongo dela ziurtatu dute. 16:00etan hasiko dira norgehiagokak.
19:00etan, berriz, helduentzako ipuin maratoia egingo dute Arizmendieneko lorategian. Honakoak arituko dira kontalari lanetan: Edurne Agirrezabala, Malen Elizasu, Lur Korta, Mirari Martiarena eta Luix Mitxelena. Sarrerak turismo bulegoan eskuratu beharko dira.
