Herriko sortzaileen puskak, bilduta
Herriko artista plastikoek erakusketa kolektiboa egingo dute larunbatetik uztailaren 30era arte. 'Puskak biltzen' izena jarri diote ezohiko erakusketari.
Hamahiru sortzailek egin diote erakusketari ekarpena. Ez dira ihoteak, baina Oiartzungo sortzaileen etxeetatik pasatu dira puskak biltzera, Puskak biltzen izeneko erakusketa kolektiboa osatzeko. Hamahiru artistaren 111 piezarekin egindako “otordu eklektikoa” ikusteko aukera egongo da larunbatetik aurrera Arizmendienean (10:00etatik 14:00etara, eta 16:00etatik 19:00etara).
Bisita gidatuak egingo dituzte: hilaren 16an (18:00etan) eta 17an (12:00etan). Turismo bulegoan hartu beharko da tokia.
Artista plastikoek adierazi dutenez, “artista multzo baten obrak erakusteko leku falta, artelan kolektibo eta aldakorra loratzeko motor bilakatu da”. Esposiziorako dagoen espazio falta hori “abagune” bilakatuko dela gaineratu dute.
“Hala, arteaz gozatzeko modu kanonikotik ihes egin dugu, hormetatik mahaira salto eginez”, adierazi dute. Ezohiko erakusketa hori izango da Arizmendienea eraikinaren barrualdeak jasoko duen lehenengo ekitaldia. Kulturabirusaren barrukoa da.
Sortzaileak
- Ager Iñarra Arrastua.
- Ainara Lasa Perez.
- Alaia Gaztelumendi Mendarte.
- Allende Arnaiz Garmendia.
- Ane Narbarte Lasa.
- Belen Moreno Zaldibar.
- Idoia Beratarbide Arrieta.
- Iosu Mitxelena Unsain.
- Karen Muñoz Etxebeste.
- Maddalen Aristegi Sanchez.
- Onintza Etxebeste Liras.
- Oskar Zapirain Herce.
- Udane Ansa Iragorri.
