'Geuretik sortuak' hitzarmena sinatu dute, sorkuntza kulturala sustatzeko
Udalak eta Udalbiltzak sinatu dute akordioa. Konpainia batek Oiartzunen egonaldia egingo du, eta herrian egitasmotik sortutakoak ikusi ahal izango dira.
Udaleko Eneritz Arbelaitz eta Jexux Leonet, Loremoreko Maialen Diaz, Udalbiltzako Jabi Asurmendi eta Loremoreko Lucia Ezker. Oiartzungo Udalak eta Udalbiltzak hitzarmena sinatu dute gaur goizean, Geuretik sortuak egitasmoa aurrera ateratzen laguntzeko. Jexux Leonet alkateak ordezkatu du udala, eta Jabier Asurmendi Udalbiltzaren presidentea izan da beste aldetik.
Hainbat diziplinetako euskal sortzaileei babesa emateko sortutako egitasmoa da Geuretik sortuak: antzerkigintza, literatura eta ikus-entzunezkoak. Egonaldi artistikoak egingo dituzte sortzaileek, eta, horrez gain, herrien arteko sare bat jostea da proiektuaren helburua.
Oiartzungo Udalaren eta Udalbiltzaren arteko hitzarmenari esker, herrian egonaldi artistikoa egingo du konpainia batek. Horrez gain, datorren urteko urtarriletik irailera arte Oiartzunen ikusi ahal izango dira Geuretik sortuak-en sortutako lanak. Bost antzezlan dira, ikus-entzunezkoen film bateratu bat eta literatur lanekin osatuko den liburu aurkezpena.
Udalak 24.874 euroko ekarpena egingo dio (aurten %60 eta datorren urtean, gainerakoa) eta egonaldiko egoitza eskainiko die sortzaileei (Karrika auzoko Iturburu etxean).
Loremore konpaina, onuradun
Udalbiltzak lehiaketa publiko bidez aukeratu ditu Geuretik sortuak egitasmoan parte hartuko duten 26 egitasmoak (udalerri bakoitzean bat). Oiartzunen Iruñeko Loremore konpainia hautatu dute.
Loremorek Trapu zikinak antzerki sorkuntza kolektiboa landuko du Oiartzunen. Abuztuaren bukaeran hasita, hiru asteko egonaldia egingo dute Oiartzunen. Lau kide izango dira bertan: Maialen Diaz Urriza, Mikele Urroz Zabalza, Ione Irazabal eta Lucia Ezker.
Egunotan herriko emakumeak txukuntzen ari diren labadero zaharra izango da proiektuaren ardatza. Ezker eta Diaz hitzarmenaren sinatzean izan dira, eta modu laburrean azaldu dute helburua. “Labaderoa izango da erdigunea, non emakumeek etxeko arropak garbitzen zituzten. Omenaldia egin nahi diegu topaleku ere baziren espazio horiei, garbitzearen ekintzaren inguruan harilkatutako istorioen bidez”.
