EH Bildu: "Udalak ez du jakin behar bezala aditzen eta behar bezain azkar egoera berrietara moldatzen"
Donibaneko herritarren eta bisitarien arteko elkarbizitza hobetzeko proposamenak egin zituzten abertzaleek ekainean. Erantzunik jaso ez izana, eta arazoa konpontzeko mugimendurik egin ez izana leporatu diote udal gobernuari.
Donibanen bisitarien presentzia nabaria dela uste du EH Bilduk. EH Bilduk udal gobernuari proposamen batzuk helarazi zizkion pasa den ekainaren 16an, sanjuandarren eta bisitarien egunerokoa “errazteko” asmotan. Gaur alderdiak salatu du ez dutela udalaren erantzunik jaso: “Oraindik ez dugu proposamen horiekin lotutako erantzunik jaso gobernuaren partetik”. Garbitasuna, elkarbizitza eta trafikoarekin lotutako neurriak dira.
Udalari leporatu diote, EH Bilduk identifikatutako gabezia horiei konponbidea bilatzeko urtebete eduki izana: “Ez dugu ikusi horiek konpontzeko inolako mugimendurik”. Beraien hitzetan, herritarren premia larrienei “zorrotz eta garaiz” erantzuteko beharra du udalak: “Udalak ez du jakin behar bezala aditzen eta behar bezain azkar egoera berrietara moldatzen”.
Jada bisitarien presentzia nabaria dela adierazi du EH Bilduk, eta azaldu dute, neurri hauek beharrezkoak direla ez herritarrentzat bakarrik, udal zerbitzuen kalitatea bermatze aldera ere.
