Egungo festen ereduari buruzko hausnarketa egingo du Itaiak
Egungo festa ereduei lotutako galderei erantzuten saiatuko dira. Sexualitatea, kontsumismoa edo despolitizazioa bezalako gaiak ukituko dituzte.
Itaiak egindako hitzaldi baten irudia.
Itaia emakume sozialisten taldeak hitzaldia antolatu du biharko. Festa ereduari buruzko hausnarketa egin nahi dute, udaletxeko pleno aretoan, 19:00etan hasita.
Esan dutenez, pandemiak hainbat debeku eta muga jarri arren, ez du festarako edo harremanak izateko goserik berdindu. Horren harira, hainbat galdera bota dituzte: “Zer dugu,baina, ospatzeko? Ba al dakigu, ordea, zergatik? eta zer ari garen elikatzen? Ekartzen ahal digu askatasun errealik aisialdirako eredu honek?”.
Festek eta sexuak —”sexualizazioa, hipersexualizazioa”— duten lotura aztertu nahi dute. Festen eremuan sortzen diren jarrera, kultur patroiak edota erasoak jorratu nahi dituzte, baita kontsumoaren alorra ere: “alkohola, drogak, jendea… Diruaren beharra. Eta despolitizazioa”.
Itaiaren ustez, kapitalismoak sortutako bizitza “miserableek” errealitatetik urruntzera bideratu eta festarako grina sortzen du. Festaren biharamunean bueltatzen direla errealitatea, “miseria, “frustrazioa”, “monotonia” edo “errutina”. “Nola eragiten dio honek emakume langileari?”, galdetu dute. Galdera horri erantzuten saiatuko dira bihar.
