Gorabehera askotariko asteburua Pasaia Kayakentzat
Pasaiatarrek urrezko bi domina irabazi eta bi jokoz kanpo jasan zituzten Euskadiko Txapelketan.
Maialen Vitoriak irabazi zuen kadeteen mailako txapela. Pasa den asteburuan jokatu zen Itsas Kayakeko Euskadiko txapelketa Hondarribiko uretan, eta bertan parte hartu zuen Pasaia Kayakek. Txapelketa oso gorabeheratsua izan zen klubarentzat, izan ere, bi jokoz kanpo izan zituen klubak. Bata, senior mailako Aritz Aranetarena izan zen, taldearen iritziz, ibilbide aldaketa bat ez zitzaiolako “behar bezala” erakutsi. Beste jokoz kanpokoa, K-2 ontzian zebiltzan Xabi Crespo eta Iñigo Loisena izan zen.
Lander Rodriguezek abantaila hartu zuen lehiakideak jokoz kanpo geratu izanari, eta “nagusitasun osoz”, hau da, minutu 1 eta 30 segundoko tartearekin, senior mailako Euskadiko txapela bereganatu zuen hirugarren aldiz. Halaber, Antton Araneta pasaitarra ere aritu zen lehia berean eta hirugarren postua irabazi zuen.
Kadeteak ere Hondarribiko kostaldean ibili ziren kayakean, eta Maialen Vitoria altzatarrak irabazi zuen lehen postua: “fin ibili ziren, bai bera, bai bere taldekide Iker Lizaso ere” nabarmendu du klubak.
Taldekako sailkapeneko bigarren postuan geratu zen Pasaia Kayak, Zumaiako Itxas-Gainen azpitik. Sailkapena jokatzeko hurrengo lehiaketa, hilaren 21ean izango da Donostia Nautiko klubak antolatutako Donostia-Pasaia-Donostia proban.
