Etxez etxeko langileen baldintzak hobetu izanagatik «pozik» agertu da udala
Azpikontratatutako enpresaren eta langileen arteko gatazka «hobekuntza guztiak» aintzat hartuta bukatu delako greba asebete agertu da udala.
Etxez etxeko langileek Iztietan egindako elkarretaratzea.
Etxez etxeko arreta langileek hasitako greba 28 egunen ondoren bukatu izanagatik «pozik» agertu da Errenteriako Udala. Komunikabideetara igorritako ohar batean bidez zabaldu duenez, azpikontratatutako enpresaren eta langileen arteko gatazka hobekuntza guztiak aintzat hartuta bukaerara iritsi dela txalotu du udal administrazioak. Areago, «hobekuntza sozialak eta ekonomikoak bermatzeko blindaje juridikoa» lortu izanagatik asebete agertu da instituzioa.
«Etxez etxeko laguntza zerbitzua funtsezkoa da udalerriko adineko edota mendeko pertsonen ongizaterako, eta 600 familia artatzen ditu», adierazi du. Zerbitzu osoa udal langileen bitartez egitearen aldekoa dela dio oharrean EH Bilduren gobernu taldeak, nahiz eta «iraganean hartutako hainbat erabakik egungo errealitatea baldintzatzen duten».
Hori horrela, lizitazioaren orduko prezioa %11 eta KPIa datozen hiru urtean igotzea onartu du udalak eta hobekuntzak lizitazio berrirako aurrekontuan sartu ditu. 2022ko urtarrilaren 1etik aurrera jasoko dute igoera langileek.
