Aiako Harrian eta Lau Haizeta parkean bizikleta «arduraz» erabiltzera deitu du udalak
BTT kirol jardueraren gorakadaren ondorioz bizikleta horien «zirkulazioa nabarmen handitu dela» adierazi du udalak, baita «erabilera okerrak eta arau urraketak» ere.
Gaztetxoak BTT praktikatzen artxiboko irudi batean.
Aiako Harria parke naturalean eta Lau Haizeta parkean BTT edo mendiko bizikleta praktikatzen dutenei zuzendu da gaur Errenteriako Udala. «Arduraz» jokatzera eta «indarrean dagoen araudia» betetzera deitu ditu txirrindulariak. Azken urteetan eta bereziki pandemiaren ondorioz kirol jarduera honen gorakada dela-eta zabaldu du mezua udalak, horrekin batera «erabilera okerrak eta arau urraketak» ugaritu baitira. Besteak beste, ondoko arau-hausteak aipatu ditu oharrean: «Legez kontrako BTT ibilbide berriak sortzea, kontrolik gabeko enpresa turistikoen jardutea, abiadura handian ibiltzea oinezkoen segurtasunari eta erosotasunari eraginda, mendian barrena eta mendizaleentzat diren mendi bideetan zirkulatzea…».
Udalaren arabera, ingurumenari eragindako kaltea areagotu da erabilera desegoki horren ondorioz. Hain zuzen, «erosio prozesuak, zoruen galera, eta Añarbe, Sanmarko eta Txoritokietako basoen eta beste habitaten gaineko inpaktua» handitu direla argudiatu du udal administrazioak.
Bada, egoera lehenbailehen kontrolatzeko helburuarekin, Aiako Harria parke naturalaren zuzendaritzak eta jabe diren udalek esku hartu eta arazoaren diagnostikoa burutuko dutela aurreratu dute. «Arazoa desagerrarazteko neurriak hartu eta aurreikusitako zehapen araubidea aplikatuko» dutela horretarako bukatu du.
