'Mater' ontzia lehorrean geratuko da iraila bukaerara arte
Itsasoan programatutako jarduera guztiak bertan behera utzi ditu museo ekoaktiboak; motorrean mantenu lanak egin behar dituztelako hartu dute erabakia.
Portuan geratuko da ‘Mater’ hilabete eta erdiz.
Mater Ontzi Museo Ekoaktiboa lehorrean geratuko da iraila bukaerara arte. Motorrean aurreikusi gabeko mantenu lanak burutu behar dituztela ezagutarazi du Izaskun Suberbiola arduradunak sare sozialetan, eta «aurrekontu murritza» dela-eta ezingo direla denbora batez itsasoratu erantsi du. Itsasoan antolatutako jarduera guztiak, beraz, bertan behera utzi behar izan ditu Mater-eko eskifaiak.
Hala eta guztiz ere, «museoak eta lurreko jarduerek aktibo» jarraitzen dutela adierazi du Suberbiolak. Areago, «orain inoiz baino gehiago animatu nahi zaituztegu Mater-era hurbiltzera, bai itsasontzi museora bisita gidatuak egiteko, arrantza modalitatean zein modalitate ekoaktiboan». Halaber, bestelako jardueretan izena ematera animatu ditu herritarrak, «arrantza-kultura barrutik ezagutzeko lonjara bisitetan, antxoa kontserben tailerretan edo Pasaiako itsasertzeko ibilaldietan. Gainera, udara garai honetan oso esperientzia berezi bat eskaintzen dizuegu; itsasontzian gaua igarotzeko aukera, arrantzaleek egiten zuten bezala».
Aukera guztien gaineko informazioa ezagutzeko posta elektroniko bidez edo 619 81 42 25 telefono zenbakira jo dezakete interesdunek.
