Kantabriatik etxera ekarri dute bandera Hibaikako emakumeek
Castro Urdialesen garaile izan dira ETEn Errenteria-Oreretako arraunlariak, eta bigarren sanjuandarrak. Bina hitzordu izan dituzte asteburuan hiru ligek.
Castroko bandera Errenteria-Oreretara ekarri zuen Hibaikak igandean. [Argazkia: Hibaika A.E.]. 
Zarauzko eta Castroko banderak -hurrenez hurren- izan dituzte jokoan joan den asteburuan Oarsoaldeko arraunlariek, bina hitzordu izanik liga bakoitzak.
ETE eta KAE 2 mailetako traineruak bi kokapenetan aritu dira, eta KAE1-ekoak Castro Urdialesen (Kantabria, Espainia) bi estropadetan. Hibaikako emakumeek bandera eskuratu zuten igandean eta, orobat, lan txukuna egin dute eskualdeko ontziek, sailkapenen gorenetan kokatuz.
Larunbata, Zarautz eta Castroko banderak
Zarautz Arraun Elkartearen XII. Ikurriña lortzeko lehen arraunkadak larunbateko 11:00etan eman zituzten KAE 2-ko gizonek. Lortutako denborekin zortzigarren sailkatu zen Hibaika eta azken (hots, hamargarren) Trintxerpe-Illunbe.
Ur berdinek hartu zuten, ordubete beranduago, Zarautz Arraun Elkartearen Emakumeen I. Ikurriñagatiko lehia, eta bertan izan ziren sanjuandar eta errenteriar emakumeak. Hibaikak podiumean izan zen tolosarren atzetik bigarren postuarekin, eta San Juango Batelerak ontzia seigarren sailkatu zen.
Arraun jardunaldiari bukaera eman zion KAE 1 ligak, 18:00etan ekinez estropadari Castro Urdialesen (Kantabria, Espainia). San Pedro lehiara gogotsu bueltatu zen (aurreko asteburuan ezin izan zuten ontzia uretaratu COVID-19 kasuengatik), hirugarren sailkatuz Libia. Sanjuandarrak bosgarren izan ziren.
Igandea, Castroko bandera
Kantabriar uretan errepikatu zuten hitzordua igandean hiru ligetako traineruek. Orduan ere, eta igandean baino kolore biziagoz gainera, podiumak eskualdeko kutsua hartu zuen, Hibaikako emakumeek bandera ekarri baitzuten Errenteria-Oreretara, 2 segundo baino gutxiagoko aldea ateraz San Juani. (Sailkapen orokorra hemen klik eginda ikus daiteke).
Gizonen bigarren mailakoak aurreko egunean baino finago ibili ziren orotara, izan ere, Azkuene ontziak azken postua errepikatu bazuen ere, Hibaikak hiru puntutan gora egin baitzuen, bosgarren sailkatuz. KAE2-ko egoera honakoa da gaur-gaurkoz.
KAE 1-eko 13. jardunaldian bosgarren izan ziren Pasaiako moreak eta zazpigarren arrosak. Ligako sailkapen orokorrean ez dago eskualdeko ordezkaririk egungo emaitzekin, baina atarian da Libia.
Bidasoko ordezkariei dagokienez, hitzordu bikoitza izan dute, halaber, Hondarribiko arraunlariek laugarren urtez jarraian eskuratu dute Zarauzko ikurrina, eta Euskotren Ligetan Zarautzen bukatu dute. Hona hemen emaitzak.
