Irailaren 16ean irekiko dituzte ateak Pasaiako hiru gaztelekuek
Trintxerpe-San Pedro, Donibane eta Antxoko udal gaztelekuen ateak zabalik egongo dira ostegun, ostiral eta larunbat arratsaldeetan.
Pasaiako Udaleko Haur, Nerabe eta Gazteen Sustapen Sailak jakinarazi du irailaren 16an irekiko dituela Trintxerpe-San Pedro, Donibane eta Antxoko Udal Gaztelekuetako ateak, uztailaren erdialdera arteko iraupena izango duen denboraldiari hasiera emateko. Areto horiek 13 eta 17 urte bitarteko pasaitarrentzat daude diseinatuta.
Pandemiak eragindako zailtasunak zailtasun, gaztelekuak irekitzeko egunak mantendu eta zabaldu egingo dituzte ikasturte honetan: ostiral eta larunbatetan 17:00etatik 21:00etara irekitzeaz gain, ikasturte honetan ostegunetan 18:00etatik 20:00etara ere egongo dira zabalik.
Irekitzeko egunak aldian-aldian gehitzen joateko asmoa adierazi dute udaletik, baina aurten, aurrekontu murrizketengatik, ezinezkoa izan zaiela aitortu dute. Nerabeak aspaldi egiten ari ziren eskaera zen hura, eta aurten hein batean, behintzat, erantzun ahal izan diote beharrari, egun batean gehiago irekiz.
Gaztelekuei buruzko informazioa:
- Antxo. Axular plaza, 7 behea. Telefonoa: 943 24 25 77.
- Trintxerpe-San Pedro. Gran Sol, 11 behea. Telefonoa: 943 24 81 98.
- Donibane. J.J. Otaegiko eraikineko hirugarren solairua. Telefonoa: 943 51 72 90.