Sexu eta generoari buruzko aholkularitza zerbitzua, irailaren 14tik martxan
Goxatu zerbitzua hamabost egunean behin eskainiko dute barruti ezberdinetako gaztelekuetan. Lahia 3.0 Sexologia eta Hezkidetza Elkarteak kudeatuko du.
Aurtengo ikasturterako, zerbitzuaren logoa berritu dute. 
Irailaren 14ean berrekingo diote gazteentzako sexu eta generoari buruzko informazioa eta aholkularitza ematen duen Goxatu zerbitzuari, Lahia 3.0 Sexologia eta Hezkidetza Elkartearen eskutik.
Barruti bakoitzean hamabost egunetik behin presentzialki eskainiko da zerbitzua 17:30etik 19:30era, gaztelekuetan, astearte eta asteazkenetan. Barruti bakoitzeko hitzorduak beheko informazio kartelean kontsulta daitezke.
Hasiera batean, Lehen Hezkuntzako seigarren mailatik aurrerako nerabeentzako zerbitzua da, haien sexuari buruzko informazioa eta prestakuntza hobetzeko. Anonimotasuna eta konfidentzialtasuna bermatuko direla ziurtatu dute antolatzaileek, kontuan izanda, betiere, bertako langileak sexualitatean eta gazterian adituak eta gaituak izango direla.
Kontsultak banaka, bikoteka edo taldeka egin daitezke; era berean, zerbitzua konfidentziala, berehalakoa, eskuragarria eta doakoa izango da, euskaraz ala gazteleraz. Esku hartzeko maila ezberdinak daude: informazioa, aholkularitza, detekzioa, beste zerbitzu batzuetara bideratzea (osasun zentroetara edo gizarte zerbitzuetara), eta laguntza eskaintzea, beharrezkoa izanez gero.
Informazio osagarririk nahi izanez gero, Pasaiako Udalaren Haurren, Nerabeen eta Gazteen Sustapen Sailera eta Berdintasun Sailera jo daiteke. Baita jarduerei buruzko informazioa jaso Instagramen edota posta elektronikora mezua bidaliz.
