Bertsolari aldizkariaren bertso paper lehiaketa, Legorbururen poltsikora
Ama eta alaba nerabearen arteko harremanean oinarritu du bere lana Legorburuk, minbizia hizpide, esperantzari lotuta.
Iñigo Legorburu artxiboko irudi batean. Zaila izango da Iñigo Legorburu idazle errenteriarra ezaguna ez duen ipuin, kontaketa labur, bertso paper lehiaketa aurkitzea. Aurkezten den gehientsuenetan, gainera, sariren bat lortzen du. Beste sari batekin heldu da errenteriarra, orain: Bertsolari aldizkariak antolatu duen lehenengo bertso paper lehiaketan lortu duen lehen sariarekin zehazki. 30 urte bete ditu aurten Bertsolari aldizkariak, eta aitzakia horrekin antolatu du lehenengoz sariketa.
Legorburuk, Bularretik mintzo bertso sorta aurkeztu zuen lehiaketara. Ama eta alaba nerabearen arteko harremanean oinarritu da lana osatzeko errenteriarra. Azken bertsoaren erdira arte mantendu du inkognita egileak, eta irakurleak orduan jakingo du minbiziaz mintzo direla ama-alabak, eta esperantzari lotuta ari direla. Xabier Leteren Amaren Bularra doinua aukeratu du Legorburuk sortarako.
Errenteriarra pozik azaldu da eta harro emaitzarekin, eta bere lana, txapelketara helduen mailan aurkeztutako beste hamabost lanekin batera argitaratu dute jada Bertsolari aldizkariaren udako alean. Gainera, Oskar Estanga bertoslariak irabazle izan diren bertsoak musikatu eta sare sozialen bidez zein podcast eta Youtube kanelatatik zabalduko dituzte.
Bertso idaztien zabalkundeari mesede egingo diola horrek uste du Legorburuk: “Arlo horretan ez gara asmatzen ari. Bertsoa gaur egungo komunikazio moduetara bikain egokitzen da, azkarra eta barneratzeko erraza delako. Gainera, asko eta askok gai sozialak ikutzen dituzte, denoi eragiten dizkigutenak, eta horrek, oso hurbilekoak bihurtzen ditu”.
Bertso sorta osorik ondoren.
BULARRETIK MINTZO
Doinua: Amaren bularra (X. Lete)
1
Hitzartuta bezala,
ilunabarrean
aspaldiko promesa
baten aparrean
hasi da abentura…
diot marmarrean
nerabea zarela
ahaztu xamarrean.
Estrainekoz, eskutik
estilo zaharrean
nerbioek barrutik
gu jan beharrean…
Normaltasun eria
denez indarrean
zenbat lehenengo aldi,
aldi bakarrean!
3
Emozioz dardarka
daukazu kokotza
baina ausarki moztu
dizute mototsa:
Ama, bizi duzuna
gaur ez zait arrotza,
zure ile-ordea
jada ez da motza!
Kimio, goragale
ta beldur bakoitza
urrun nabari ditut,
urrun heriotza!
Hil ordez, ile-orde…
ta akabo lotsa!
Bularraren ordezko
dut zure bihotza.
