Lezoko III. Berdintasun Plana gorpuzten ari dira
Mahaiaren gainean jarri diren proposamenak aztertzeko kontraste saioak egingo dituzte irailean zehar, arloka. Azarorako osatu nahi dute plana.
2021aren hasieran abiatutako Lezoko III. Berdintasun Planaren diseinuak aurrera darrai. Jada herriak berdintasunari dagokionean duen egoeraren gaineko diagnostikoa egina dago, baita esparru horretan egindakoen ebaluazioa ere. Murgibe aholkularitzaren laguntzarekin, 111 izan dira prozesuarekin bat egin duten herritarrak (67 emakume eta 44 gizon) udalak esan duenez. Parte hartzen ari diren eragileen zerrendan daude Lezoko Emakume Taldea, Gaxuxa, Lezo Institutua, Ikastolako Guraso Elkartea, Arkirun Pilota Kluba, Ixkulin elkartea, Xoxolur Mendi Kluba, Piztu Lezo, Haurtxokoa, Kuadrillategi, Pasaia-Lezo Lizeoa, Berritzegunea eta Herri Eskolako Guraso Elkartea. Etxeetara bidalitako galdetegien bitartez (online ere egon da eskuragarri) beste hainbat lezoarrek egin dute ekarpena.
Udalak adierazi du azarorako nahi dutela osatu III. Berdintasun Plana. Bide horretan, mahaiaren gainean jarritako proposamenak kontrastatzeko saioak egingo dituzte irailean, hurrenkera honekin:
- Irailaren 7an (asteartea). Udal teknikarien saioa, udaletxean, 09:30etik 11:30era.
- Irailaren 8an (osteguna). Lezoko Emakume Taldearekin eta Gaxuxarekin saioa, Kultura Aretoan, 18:00etatik 20:00etara.
- Irailaren 9an (osteguna). Udaleko hautetsiekin saioa, udaletxean, 09:30etik 11:·0era.
- Irailaren 21ean (asteartea). Hezkidetza mahairekin saioa, Kultura Aretoan, 09:15ean.
- Irailaren 29an (asteazkena). Kultur, kirol eta euskara eragileekin saioa (tokia eta ordua zehazteke).
Ondorioak
Iraileko kontraste saioen aurretik badago lana egina. Tartean da herriko berdintasun egoeraren gaineko diagnostikoa eta ebaluazioa. Datu esanguratsu asko eman ditu horrek, Lezoko emakumeen egoera eta bizi baldintzak gizonenak baino kaskarragoak direla agerian uzten dituztenak. Honakoak dira datuak, puntuz puntu:
- 2018an, Lezoko emakumeen errenta pertsonala 14.969 eurokoa zen, gizonena 23.737koa.
- Diru sarrerak bermatzeko errenta jasotzen duten pertsonen artean %21,34 dira emakumeak, eta %12,1 gizonak.
- 2020ko martxoko datuen arabera, emakumeen langabezia tasa %11koa da, eta %9koa gizonena.
- Udal langileei dagokienez (63 dira), 32 dira gizonak eta 31 emakumeak. Baina sail eta zerbitzu maskulinizatuak daude, adibidez, brigada, Udaltzaingoa, Euskara Saila, Kirol Saila, Kultura Saila edota Musika Eskola. Aldiz, Gizarte Zerbitzuen Saila guztiz feminizatua dago.
- Udalean, lan egonkortasunari begirako datuei erreparatuz, karrerarako funtzionarioen artean %41 dira emakumeak, eta %59 gizonak. Langile interinoen artean, berriz, %62 dira emakumeak eta %38 gizonak. Lanaldi partzialetan (edo ez osoan) dabiltzan ia gehienak emakumeak dira.
Horiek jasotzeko, besteak beste, hainbat egoera bizi dituzten emakumeekin elkarrizketak egin dituzte, besteak beste indarkeria matxista jasan duten emakumeekin, emakume transexualarekin, edo aniztasun funtzionala duen baserritarrarekin. Caritaseko, Aiton Bordako eta udaleko gizarte langile batekin ere egin dituzte elkarrizketak.
Bestalde, II. Berdintasun Planak (ordezkatu nahi den plana) betetze maila “ez oso altua” izan duela baloratu dute prozesuan parte hartzen direnek, eta inpaktua txikia izan dela: “Gutxi ezagutzen da plana, eta ia ez dira emakumeen jabekuntzarako programak landu”. Murgibe aholkularitzak adierazi du udalak berdintasunaren aldeko konpromisoan eta lanketan gehiago sakondu behar duela
Zentzu horretan, udalak azken urteetan eman dituen hainbat urrats nabarmendu ditu. Honakoak dira, hitzez hitz, udalak zehaztutakoak:
- I. Berdintasun Planarekin alderatuta, Berdintasun teknikaria du udalak, aurrekontu propioa du sailak eta berdintasun politikak koordinatzeko egiturak sortu dira.
- Udalaren webgunea berritu zen, Berdintasun Sailaren atala sortu da eta webguneko testu guztien azterketa egin da hizkuntza barneratzailearen ikuspegitik.
- Diru laguntzen ordenantza aldatu da Berdintasun irizpideekin bat egiteko. Diru laguntza eta hitzarmen gehienetan txertatu dira klausulak. Ixkulin, emakumeak bazkide gisa onartzen ez zituen elkarteak, bere estatutuak aldatu eta dagoeneko badira emakumeak elkarteko bazkideen artean.
- Autolaguntza taldea, indarkeria matxistak kaltetuentzat, 2016tik dago abian, inguruko herriekin batera, horri aurre egiten dioten emakumeei oldarkeria katetik atera eta ahalduntzeko aukera emanez.
- Zabarre Pirata pertsonaiari buruz eta emakumezkoek parte hartzeko beharraz gogoeta egin da, eta Maria Labaien sagardogilearen pertsonaia sortu da.
- Jaietan, eraso sexisten kontrako kanpainak antolatu dira.
- Hezkidetzari buruzko formazioa egin da Eskola Kiroleko begiraleekin, kirol elkarteetako kideekin, eta Kuadrillategiko begiraleekin.
- Martxoak 8 eta Azaroak 25 data klabeetan kanpainak antolatu dira Gaxuxarekin, Lezoko Emakume Taldearekin, eta hezkidetza mahaiarekin batera.
