Antzerkia, dantza eta musika doinu latzak Kilometro Lezon
Ostiralean antzerkia eta dantza izango dira Herri Eskolako patioan. Larunbatean rock doinuen txanda izango da, tartean herriko taldeak direla.
Hortzmugarem antzerki emanaldiaren pasarte bat. Argazkia Hortzmuga Teatro. Kilometro Lezo kultur egitasmoaren azken aurreko asteburua izango da datorrena. Ostiral eta larunbata artean lau emanaldi izango dira Herri Eskolako jolastoki estalian. Horietarako hirurako sarrerak eskuratzeko aukera dago; larunbatean (23:00) Willis Drummond taldeak emango duen kontzerturako tiketak agortu egin dira.
Bihar (hilak 3, ostirala) 20:00etan antzerkirako leihoa zabalik. Hortzmuga antzerki taldeak Bidearen amaieran obra emango die Herri Eskolako eserlekuetan egongo direnei. Gau partean, 23:00etan, dantza emanaldia izango da Laila Tafurrekin: Monstruo ikuskizuna emango du.
Etzi (hilak 4, larunbata) dezibelioen txanda. Presta daitezela Herri Eskolaren inguruko bizilagunak doinu latzak eta altu entzuteko. 20:00etako saioan Tomas Garbizu Lezoko Musika Eskolako aterkipean sortutako hiru rock eta folk talderen kontzertua izango da: Gotzen, Ordu Txarra eta Jaig dira anplifikadoreei lana emango dieten taldeak. Gauez (23:00), Willis Drummond aterako da oholtzara; bertarako sarrera guztiak hartuta daude.
Sarrerak lortzeko, klik egin esteka honetan.
