Udako oporraldiaren ostean ere, ondareaz gozatzeko beta
Urri amaierara arte Lau Haizeta parkea eta Txoritokietako estazio megalitikora, Aizpitarteko leizeetara eta Añarbeko baso erreserbara bisita gidatuak eskainiko ditu udalak. Doakoak dira guztiak.
Aizpitarte haitzuloetara bisita. Argazkia: Mendi Urruzuno Ehunka kilometro egin behar direla sinistuta daude asko paisaia eta eremu bereziak aurkitzeko, eta gehienetan, esku artean ihesi doaz gertuan diren eremu gogoangarriak. Gertukoei, baina, ezezagunagatik batzuetan, edo hain justu gertuan direlako besteetan, ez zaie merezi moduan erreparatzen.
Pasa den hilabetetik gertu-gertuan diren altxor horietako batzuk eskura jartzen ari da udala, eta bisita gidatuen bidez ari da erakusten Lau Haizeta parkea eta Txoritokietako estazio megalitikoa, Aizpitarteko leizeetako aztarna paleolitikoak, eta Añarbeko baso erreserba. Bisita gidatuak urrira amaiera arte eskainiko ditu. Gertuko ondare hori herritarren eskura jartzea da xedea, ezagutaraztea eta babestea, eta kontzientzia sortzea bide batez. Seigarren urtea dute honakoa bisita horiek eta Galemys enpresak gidatzen ditu.
Margi Iturriza Galemyseko ingurumen hezitzailea da, eta aurten ere bisita horiek erantzun paregabea izaten ari direla nabarmendu du: «Batez ere Aizpitarteko leizeetakoa. Horietarako plazak beteta daude, hiruren artean arrakasta handiena duena da». Igandean egingo dute bisita berriro Aizpitartera, eta hilaren 25ean eta urriaren 17an azkenak. Guztietarako agortuta daude plazak: «Kobazuloak itxita daude eta bisita horietan barrura sartzeko aukera dago 15 minutuz eta puntu jakin bateraino. Horrek asko erakartzen du jendea. Barruan isilik izan behar dugu, eta argirik gabe, kobazuloetan egindako aurkikuntzak eta saguzar kolonia babesteko». Lau Haizeta eta Txoritokietako estazio megalitikoa (hilak 11 eta 19, eta urriak 5) eta Añarbeko baso erreserbako (urriak 3 eta 23) bisitetarako badago tokia oraindik.
Bisitariak, ingurukoak
Hiru bisitak altxorra direla azaldu du Iturrizak. «Batez ere Errenteriakoak eta ingurukoak dira bisitariak, Lezo eta Oiartzungoak. Sortzen den giro politaz aparte, bisitari askok bere ekarpena egiten dute».
Doakoak dira irteerak eta horietan parte hartzeko aldez aurretik eman behar da izena 943 49 45 21 telefono zenbakira deituta, edo posta elektroniko helbidera mezua bidalita».
