Olaberria eta Olaundituko burdinolak ikertzeko eska daiteke Manuel Lekuona beka
Herriko burdinola zahar horiek ikertzeko proposamenak hilaren 30era arte aurkez daitezke. Udalak 6.000 euroko laguntza emango dio bekadunari.
Olaberria burdinola da ikertu beharko dutenetako bat. Oiartzungo Udalak Manuel Lekuona beka emango du aurten ere bai. Ekitaldi honetan Olaberria eta Olaundituko burdinolak ikertzea izango da bekaren helburua. Gaia udalak eta Ondarearen Mahaiak adostu dute.
Ikerketak ola horien alderdi historikoa dibulgatzeaz gain, horiek aintzatesteko balio izango du. Oiartzungo Udalak, horretarako, 6.000 euroko diru-laguntza emango du.
Hilaren 30era aurkez daitezke proposamenak, udal erregistroan. Banaka zein taldean aurkez daiteke proposamen hori; horretarako, proiektuaren txostena eta egilearen datuak aurkeztu beharko dira.
Aurkezten diren proposamenen artean, Historia eta Kultura arloko ezagutzak dituen epamahaiak baloratu eta aukeratuko du proiektu egokiena.
Bekadunari esleipena egin ondoren, bederatzi hilabeteko epea izango du lana osatzeko. Egin duena jendaurrean aurkeztu beharko du, eta lan hori Oiartzungo Udal Artxiboan zein Ondarearen webguneko artxiboan gordeko da.
Beka deialdiaren oinarri guztiak hemen klik eginda aurki daitezke.
