[Galeria] Ustez arma bat zuen gizon baten mehatxuagatik Antxo hesitu dute
Suzko arma bat zeraman gizona balkoi batean hauteman dutela jakinarazi dute hainbat bizilagunek. Hainbat kale lokarriz hesitu ditu Ertzaintzak.
Ustezko armadun gizona hauteman artean, trafikoa moztu du Ertzaintzak Antxoko hainbat kaleetan. Arratsaldeko 19:45ak aldera hainbat ertzain patruila-auto Antxora bertaratu eta kale nagusietako batzuk lokarriz hesitu dituzte, tartean, Blas de Lezo, Maiatzaren Lehena eta Nafarroa etorbidea. Hainbat bizilagunek jakinarazi dute suzko arma zeraman gizon bat hauteman dutela inguru hartako balkoi batean. Ertzaintza ez ezik, anbulantzia bat ere bertaratu da gunera.
Abisua nork eta zergatik eman duen ezjakina da oraindik, baina hainbat antxotarren betsioak bat datoz: gizon bat zegoen hesitutako kaleetako balkoietako batean, suzko arma bat eskuan. Poliziak inguruko balkoietara atera diren bizilagunei etxe barruan sartu eta pertsianak ixteko agindua eman die.
Denbora-tarte batez zirkulazioa etenda egon da aipatutako bideetan, egoera kontrolpean egon den arte. Badirudi azkenean Ertzaintzak norbanako bat atzeman duela Maiatzaren Lehena kalean, Nafarroa etorbiderako bidegurutzera heltzeko puntuan.
Hori gertatu ostean, Antxoko kaleak ohikotasunera bueltatu dira berehala, tarte batez iraun duten jende pilaketak azkar sakabanatu baitira. 20:30ak aldera kendu dituzte lokarriak kalez jantzitako nahiz uniformedun hainbat ertzainek.
