Barruti guztietan lur hartuko du aurten emakumeentzako Jabetze Eskolak
Gune berriak sortuko dituzte, besteak beste, zoru pelbikoa lantzeko tailerra, harreman afektiboetan arakatzeko saioa, eta emakume korrikalariak batzeko.
Pasaiako Udaleko Berdintasun Mahaiko kideek gonbidapena egin diete emakume pasaitarrei, Jabetze Eskolara batzeko. 
Pasaiako Jabetze Eskolako 2021eko udazkeneko programa aurkeztu du udalak, Berdintasun Mahaiko kideekin elkarlanean. Gero eta emakume gehiagok hartzen dute parte (iaz 170 izan ziren) espazio horretan, euren eskubideen jabe egiteko, haien bizitzetan autonomia eta konfiantza sendotzeko eta beste emakumeekin sareak sortzeko.
Aurten, berrikuntzekin dator eskola, batetik, barruti guztietan eskainiko delako aukera, gutxienez, tailer edo ikastaro bat egiteko (lehen Trintxerpen izaten ziren guztiak), eta, bestetik, espazio berriak sortuko dituztelako, besteak beste: zoru pelbikoa lantzeko; sormena garatuz, osatu eta indartzeko; tratu onak abiapuntu izanda harreman afektiboetan arakatzeko; eta emakume korrikalarien taldea.
Horiez gain, urtez urte mantendu izan diren ikastaro eta taldeek bere horretan jarraituko dute:
- Batetik, autoestimua eta emozioak lantzeko ikastaroak eta mindfulness-a.
- Bestetik, hiru talde egonkor: Jatorri askotariko emakumeak, Indarkeria matxistari aurre egin dioten emakumeentzako autolaguntza taldea, eta Ongi zaintzen eta maitatzen ikasteko taldea.
- Eta, azkenik, gune bat: jatorri askotariko emakumeek elkar ezagutzeko.
Aurtengo formatzaileen artean egongo dira, besteak beste, Pepa Bojo, Vega Ayllon, Kontxi Lopez, Clara Wolfram, Ana Murcia, Maider Andonegi, Ane Etxeberria, Izaro Mariezkurrena, Sara Dorronsoro; Sorburu kooperatibako kideak; eta Emagineko kideak.
Eskaintza doakoa da, baina halabeharrez eman beharko da izena aurretik. Aipatutakoarekin, haurtzaindegi zerbitzua ere eskainiko dute Jabetze Eskolaren baitan, eta hori behar duenak izena emateko garaian adierazi beharko du. Hilaren 25era arte egongo da epea zabalik, ohiko bideetatik:
- HAZeko bulegoetan (hitzordua hartu aurrez deituta) entregatu daiteke izen-emate fitxa beteta: webgunean edo HAZeko bulegoetan eskura dezakezu fitxa.
- Pasaiako Udaleko zerbitzu telematikoen bidez.
