Frankistek duela 85 urte Lezon eragindakoa oroituko dute
Errepublikaren aurka matxinatutako tropak Lezon sartu ziren irailaren 13an. Udal Korporazioa indargabetu eta langile bat erail zutelako omenaldia egingo diete
Frankistek eraildako Felix Arriaga udal garbitzailea omenduko dute. Argazkia: Etxetxo 85 urte pasa dira frankistek miliziano eta gudariek Jaizkibel eta Gaintxurizketan egindako bide mozketak gainditu eta Lezon sartu zirela, Udal Korporazioa indargabetu eta Felix Arriaga Zapirain langilea erail zutela lehergailu bat jaurtita. Gertakari hauek oharkabean uzteko asmorik gabe, omenaldia eskainiko die Etxetxo Lezoko Memoria Historikoaren Elkarteak.
12:30ean hasiko da ekitaldia hilaren 11n, larunbata, Udalbatza Aretoan. Ekitaldi itxia izango da, prentsa eta gonbidatuak bakarrik agertuko direna. Oroimenezko plaka bat inauguratuko dute 1936ko Udal Korporazioa osatzen zuten kideen omenez: Patricio Lopetegi, Vicente Aierdi, Jose Maria Bengoetxea, Ignacio Pikabea, Venancio Salaberria, Anastasio Salaberria eta Florencio Salaberria.
Ordu erdi geroago, 13:00ean, eraila izan zen Felix Arriaga Zapiraini egingo diote omenaldia. Horretarako plazara aterako dira, baina COVID-19a dela-eta 150 eserleku soilik egongo direla aurreratu dute. Agurra dantzatu eta lore eskaintza egitearekin batera plaka baten inaugurazioa ere egingo dute, koroak girotuta.
Ekitaldi gehiago
Memoria Historikoa landu nahian eta testuinguru hau kontuan hartuta ekitaldi gehiago antolatu ditu Etxetxok. Hilaren 16an, osteguna, dokumentala eskainiko dute Gezala Auditorioan: Haur Erbesteratuak. 19:30ean hasiko da eta doakoa izango da. Bestalde, azaroaren 27an, Requiem por un campesino español antzerkia eskainiko dute leku berean. Horrek 8 euroko prezioa izango du eta ohiko moduan erosi ahalko da. 20:00etan hasiko da ikuskizuna. Bi saio horietarako sarrerak lortzeko, klik egin hemen.
