Ekoizpen arduratsua lehen lerroan jarriko du Biolurrek
Azoka ekologikoaren zazpigarren ekitaldia egingo du Biolurrek bihar herrian. Hamazazpi ekoizle eta produktu ugari bilduko ditu eredu ekologikoan ekoitzitakoa jendartean zabaltzeko, Gamon Zumardian.
Iazko azoka ekologikoaren irudi bat. Argazkia: Biolur Askotariko produktu ekologikoen topagune bilakatuko da bihar Errenteria-Oreretako Gamon Zumardia. Izan ere, zazpigarrenez, Biolur elkarteak antolatzen duen azoka ekologikoa hartuko du. Nekazaritza eta abeltzaintza ekologikoa ezagutarazteko helburuarekin sortu baziren azoka horiek hasieran, gaur egun ezagunagoak dira, baina oraindik ere askotan «nahasgarriak» diren mezuak zabaltzen direla dio Maider Zubikarai Beristain Biolurreko koordinazio arduradunak.
«Lurra, ingurumena, abereak eta pertsonak zainduz ekoizten diren eredu ekologikoen alde lan egiten dugu, eta azoka ekologikoek balio horiei guztiei lekua emateko xedea dute. Bertako baserritar eta ekoizle ekologikoak ikustarazteko eta duten balioa aldarrikatzeko, batetik; bestetik plazak gertukoak izanik, bide motzeko salmenta kanalak dira harreman zuzenean oinarritutakoak, eta gertuko ekonomian eragina izateaz gain, eragin soziala ere badute», azaldu du Biolurreko kideak.
Osasun krisiari ere erreparatu dio Zubikaraik: «Norbanakoaren, komunitatearen eta planetaren osasuna krisian dagoen honetan, ezinbestekoa da ekoizpen eta kontsumo ereduei arreta jartzea; azokak, balio horiek jendarteratzeko agertoki egokiak dira».
Hamazazpi ekoizle
Goizez izango da azoka, 10:00etatik 14:00etara. Euskal Herriko hamazazpi ekoizlek hartuko dute parte, gehienak gipuzkoarrak. Sasoiko barazkiak, pasta, olioa, marmeladak, ogia, gozogintza, eztia, gazta, kontserbak, lekaleak, haziak eta arropa izango dira bertan.
Euskadiko Nekazaritza eta Elikadura Ekologikoaren Kontseilua da ekologikoaren zigilua ematen duena, eta erakunde horren erroldaren arabera, ekologikotik ari diren hamalau ekoizle daude alta emanda Oarsoaldean. «Horien erdia, gure elkarteko kide dira», gaineratu du Zubikaraik. Ekoizpen ekologikoaren osasun egoeraren gainean galdetuta, gero eta gehiago direla ekologikotik erosten dutenak uste du Biolurrekoak. «Jendea non eta nola gastatu eguneroko iraultza txiki baten gisa bizi duenik bada, eta beste askok norbanakoaren osasunari erreparatuta erosten dituzte elikagai ekologikoak; uste dut bi multzo hauetan gero eta gehiago direla».
Nekazal errolda 2022an kaleratuko dela azalduta, 2016ko datuak eman ditu Zubikaraik, hori da nekazal erroldaren azken datua: «Ekoizpen ekologikoaren presentzia nekazal lurretan %5 ingurukoa da Hego Euskal Herrian; %4koa Araba, Bizkai eta Gipuzkoan eta %6koa Nafarroan. Gipuzkoako datuei erreparatuta azken hogei urteetako eboluzioa positiboa izan bada ere, oraindik lan asko dago egiteko».
Biolurrek bazkidetza kanpaina martxan du. Egun 125 bazkide baserritarrek eta 153 herritarrek osatzen dute elkartea: «Dagoeneko Gipuzkoako nekazari, abeltzain eta okin ekologikoen erreferentzia eta bilgune nagusia garela esan dezakegu». Horren gaineko informazioa ere zabalduko dute bihar Zumardiko topagunean. 5
