Olatz Mitxelena Larretak irabazi du Igartza Saria
'Arrakalak' ipuin bilduma proiektuarekin irabazi du literatur beka. Urte bat izango du egitasmoa osatzeko; pitzadurak izango dira ipuinen arteko loturak.
Olatz Mitxelena Larreta (Oiartzun, 1989).
Olatz Mitxelena Larretak irabazi du XXIV. Igartza Saria. Elkar argitaletxeak, Beasaingo udalak eta CAF enpresak antolatzen duten beka da, 35 urte arteko idazleentzat.
Arrakalak izeneko ipuin bilduma osatzea da Mitxelenaren asmoa, eta lau ipuin aurkeztu zituen lehiara. Itziar Ugarte Irizarrek Berriarako jaso duenez, urtebeteko epea izango du proiektua osatzeko. Elkarren artean ezberdin diren ipuinekin osatu nahi du bilduma, eta lotzen duen haria pitzadurak izango dira.
Bideak markatuko dio zein tonu, zenbat ipuin eta zenbat ahots sartuko dituen azkenekorako. “Plazer hori oparitu nahi diot orain nire buruari”, adierazi du oiartzuarrak.
Bi begirada uztartuko du, bat “intimoagoa eta hausnarketari lotuagoa”, eta bestea “jolastiagoa”, fantasiaren ildotik. Xabier Mendiguren Elizegi Elkarreko editorearen arabera, nagusi den tonu errealistatik at kokatu ditu kontakizun batzuk.
Beka horrekin, Mitxelenak lehen liburua onduko du. Aitortu duenez, idatzi beti idatzi du. Teklatuari emanda lortu zituen, adibidez, Bordari eta Urruzuno sariak. Besteak beste, Mitxelena HITZAren kolaboratzailea da.
Saria gaur arratsaldean bertan emango diote, Beasaingo Igartza jauregian.
