Labandibarrek Ramiro Pinilla eleberri laburren lehiaketa poltsikoratu du
Idazle oiartzuarrak 'Biharamuna' kontakizunarekin lortu du saria. 30-40 urte arteko belaunaldiaren kezkak jasotzen ditu.
Ramiro Pinilla eta Txiki Baskardo lehiaketetako saridunak. Labandibar, bigarrena eskuinetik (beltzez jantzita). Aste emankorra izaten ari da idazle oiartzuarrentzat. Olatz Mitxelena Larretak Igartza Saria lortu zuela jakinarazi bazuten atzo, arratsaldean Goiatz Labandibarrek Ramiro Pinilla eleberri laburren IV. Lehiaketako saria jaso zuen, euskarazko alorrean, Getxon.
Biharamuna kontakizuna aurkeztutakoen artean onena zela erabaki zuen epaimahaiak. 30-40 urte arteko belaunaldiaren kezkak eta bizipenak papereratu ditu Labandibarrek. Ohiko bizimodua duen emakume arrunt bat da protagonista, eta ezusteko gertakari batek bere eguneroko normaltasuna krisian jarriko dut.
Getxoko Udalak izendatutako epaimahaiaren arabera, eleberriak “gaurkotasun handia” du. “Lan hau narrazioaren freskotasunagatik nabarmentzen da, irakurlea istorioan zuzenean sartu eta kontakizunak aurrera egin ahala tentsio narratiboa mantentzen duelako”, adierazi dute epaimahaikideek.
Oiartzuarrek, beraz, bi literatura sari jaso dituzte aste honetan… eta bi egun eta erdi falta dira astea bukatzeko.
Miguel Paz Cabanas Corralek jaso zuen gaztelerazko ataleko saria, Banksy estuvo aquí lanagatik. Txiki Baskardo haur eta gazteentzako literatura lehiaketako sariak ere banatu zituzten ekitaldi berean.
