Larunbatean, Josetxo Etxandiko herri mailako finalak
12:00etan hasita Haur eta Gaztetxo mailetako finalak jasoko ditu Koldobide Gezala pilotalekuak; arratsaldean, berriz, helduena (18:30).
Aurtengoz, azken hatsa egingo du bihar (hilak 18, larunbata) Josetxo Etxandi pilota txapelketak. Herri mailako txapelketaren finalak jokatuko dituzte goizean eta arratsaldean Koldobike Gezala pilotalekuan. Frontoiko aforoan muga dago, horregatik erabaki dute antolatzaileek bitan zatitzea finaletako partidak.
12:00etan, Haur Mailako azken partida erabakigarria jokatuko dute Zearreta-Zabala eta Telletxea-Santesteban bikoteek. Ondoren gaztetxoen finala: Carranza-Osa eta Martinez-Blanco ariko dira nor baino nor.
Arratsaldean iritsiko da Helduen Mailako finala, 18:30ean. Horretan Iñarra-Maritxalar eta Tatiegi-Tatiegi bikoteak joango dira txapelaren bila.
Federatuen finalak
Larunbatekoa herri mailako pilotarien eguna bada, asteartean federatuen txapelketena izan zen. Hiru final jokatu zituzten Koldobike Gezalan.
Emakumeen lau t’erdikoan Olatz Arrizabalaga izan zen irabazle, Amaia Aldairi 22-17 irabazita. Gizonen Etorkizuneko Izarren kategorian, berriz, Josu Igoa izan zen nagusi Jorge Fernandezi 22-17 irabazi ziolako. Lehen Mailako afizionatuetan (gizonak eta bikoteka) Eneko Yoldi eta Mikel Beroizentzat izan zen txapela, finalean 22-13 emaitzarekin mendean hartu zituztelako Iker Espinal eta Beñat Garmendia.
