Oiartzunera etorri berriak euskarara gerturatzera gonbidatu ditu udalak
500 laguni euskarara gerturatzeko informazioa helarazi die udalak, bost hizkuntzatan. "Euskarak gerturatu egiten gaituelako" egin du bat kanpainarekin.
Udalerrira heldu berriak direnak euskarara gerturatzera gonbidatu ditu Oiartzungo Udalak, Oarsoaldeko Euskara Batzordearen Ongi etorri! kanpainarekin bat eginez. Eskualdera etorri berri direnak euskara ikastera gonbidatzeko helburua du iniziatibak, “euskarak gerturatu egiten gaituelako”.
Saiakerarekin bat eginez, azken bost urteetan Euskal Herri kanpotik Oiartzunera etorri diren 500 laguni informazioa bidali die udalak, euskaraz, gazteleraz, arabieraz, frantsesez eta ingelesez. Gogora ekarri dute, halaber, udalaren beka sistemari esker, euskara ikastea dohainik dela B2 mailara arte.