'Mater', euskal kostaldeko hondakinei aurre egiteko marearen buru
Libera proiektuarekin bat eginez, ekosistemen eta biodibertsitatearen arazoari aurre egiteko hainbat ekintza antolatu ditu ontzi museoak.
Zero zabor uretan kanpainaren baitan Pasaiako portuan jasotako hainbat hondakin. 
Mater, Pasaiako Ontzi Museo Ekoaktiboa, Libera proiektuarekin bat eginez, eta SEO/BirdLifek Ecoembesekin sorturiko aliantzan funtsatuta, elkarlanean ariko da beste naturako hondakinen aurkako borrokan. Gaur goizean egin dute saiakera bateratuaren aurkezpen ofiziala, San Pedron.
Ingurumen hezkuntzako jarduerak bultzatuz, hainbat ekintza antolatu ditu ontzi museoak ekosistemen eta biodibertsitatearen arazoari aurre egiteko. Artean, hondakinak jaso eta datuak biltzeko saioak egingo dituzte, ingurune naturaletan (ibai, mendi eta hondartzetan) dagoen zaborraren kantitatea eta tipologia ezagutzeko.
Igande honetan bertan, hilak 26, Alabortza garbituko dute. Matereko zuzendari Izaskun Suberbiolak bat egiteko deia egin die pasaitarrei: “Arazoa zeure kabuz ikusi eta ukituta bakarrik jabetzen zara zugan ere badagoela konponbidea, erabilera bakarreko plastikoak alde batera utzita”. Lankidetzaren beste osagai nagusietako bat uztailean zehar ontzian egingo den ingurumen sentsibilizazioko kanpaina izango da.
Gaur goizeko topaketarekin bat egin du Sara Guemes Ecoembeseko proiektuaren koordinatzaileak. Esker onez zuzendu zaie Mater ontziko arduradunei: “Aliantza honek apur bat gehiago hurbiltzen gaitu Liberan dugun helburura, hau da, naturako hondakinen aurkako borrokan aldaketarako agente izatera”. Suberbiolak ildo beretik erantzun dio: “Bizi dugun ingurumen krisi honetan, berehalako ekintza beharraren mezua maila guztietara zabal dezakegu elkarlanean”.
Zero zabor uretan, “emaitza tristearekin”
Ontziaren arduradunek azaldu dute Zero zabor uretan kanpainaren hirugarren ekitaldia bukatu den honetan emaitzek agerian uzten dutela ezinbestekoa dela gizartean behin betiko ohitura aldaketa egitea, “itsasoa ez dela zabortegia ulertzea eta bizi iturria dela jabetzea”.
Ontziko arduradun nagusia iniziatibari halabeharrez emandako ezohiko bukaeraz penatu da: “Kanpaina Pasaiako gure portu nagusian bukatzea, botiloiek eragindako hondakinen 29 kilogramo jasoaz, tristea izan zen, besterik gabe”. Aukera probestu du arduradunak hondakinik onena sortzen ez dena dela gogora ekartzeko.
Kanpainan zehar gauzatutako bilketek agerian utzi dute itsas zaborraren kopurua, eta beraz, arazoa bera, “izugarria” dela. Guzti horien detailea Zero zabor uretan kanpainaren webgunean ikus daiteke.
