Arraskuelarre kalea berrantolatuko dute, mugikortasuna hobetzeko
Kalearen alde oso bat oinezkoentzako izango da. Aparkatzeko tokiak ez dira murriztuko, baina txandakatze ordutegia izango dute astelehenetik ostiralera.
Karga eta deskargarako eremu bat sortu dute.
Arraskuelarre kalea berrantolatzeko lanak egiten hasi da Oiartzungo Udala. Mugikortasuna eta irisgarritasuna hobetu nahi du. Modu horretan, kalearen alde oso bat oinezkoentzako “espazio seguru” bihurtuko dutela iragarri dute.
Zamalanen gune berri bat sortu dute, Belutene dendaren ondoan. Odriozola gozotegiaren ondoko zamalan eremua bertan mantenduko dela ziurtatu dute. Berritze lan horrek ez du eragingo kale horretako aparkaleku kopuruan, orain arteko bera izango baita.
Gainera, Odriozola gozotegiaren eta Belutene dendaren arteko aparkatzeko eremuan txandakatze-sistema jarriko dute epe motzean. “Merkataritza gune garrantzitsua da Arraskuelarre kalea eta bezeroei komertzioetara heltzeko erraztasunak emateko asmoz, astelehenetik ostiralera txandakatze sistemako aparkalekua izango da”, esan du udalak.
Ordutegia 09:00etatik 13:30era, eta 15:30etik 19:30era izango da. Txandakatze sistema hori martxan jarri aurretik jakinarazpena zabalduko duela adierazi du udalak.
